Great Greenland millioninik sinneqartooruteqaqqippoq
Great Greenlandip kaaviiaartitani annertusivai millioninillu sinneqartooruteqarluni. Amernik tunisilluartoqarnera aamma nioqqutinik piariikkanik tunisat annertusinerat qaffariartitsipput. Inuusuttoq ilisimatusartoq siulersuisunut ilaasortanngortinneqarpoq.
Great Greenland A/S 2022-mi akileraareernermi 2,8 mio. kr.-nik sinneqartooruteqarpoq, 2021-mut sanilliullugu 2,2 mio. kr.-nit missaannik qaffariarfiulluni. Kaaviiaartitat 2021-mut sanilliullugu 14,7 mio. kr.-nit 17,9 mio. kr.-nut qaffariarpoq, tassa 18 procentinik, tamannalu kaaviiaartitat 10,3 mio. kr.-niunissaannik missingersuuteqarnerannit pitsaaneruvoq.
Kaaviiaartitat annertusinerat aamma akileraareernermi sinneqartoorutit, aqutsisut naammagisimaarlugit 2022-mut ukiumoortumik nalunaarusiami nalunaarutigaat.
2022-mi tunisineq annikitsunik unammillernartoqarsimasoq, Great Greenlandip aqutsisui ukiumoortumik nalunaarusiami ilisimatitsipput, kisianni ataatsimut isigalugu tunisineq naammaginarpoq, 29.000-t sinnilaarlugit tunisisoqarpoq.
Tunisat pulaartullu amerleriartut
Natsit amiineq tunisinermi qaffariartoqarpoq, kiisalu aataat amiinik tunisat ikileriarlutik.
Coronap pissutigalugu killilersuutit ukiup aallartinneranit atorunnaarsinneqarnerisa kingorna, Great Greenlandip takutitsivianut isertartut annertuseriaqqinnerat ilutigalugu nioqqutinik piariikkanik tunisineq annertuseriarpoq.
Ilaatigut umiarsuarnit takornariartaatinit alakkarterisartut amerleriarput. Aamma suliffeqarfiit sulisuminnut juullimut tunissuteqaataannik tunisat amerleriarput, ammerivimmik taakku ulapitsitsisarput. Suliffeqarfik suli 32-nik sulisoqarpoq.
Inuusuttoq ilisimatusartoq siulersuisunut ilaasortanngortoq
Nikoline Ziemer ukiuni marlunni Great Greenlandimi siulersuisuni ilaasortaareerluni tunuarpoq, taannalu Ph.d.-tut ilisimatusartumit Ulunnguaq Markussenimit kingoraarneqarpoq, taanna ilaatigut Tasiilami illoqarfimmik ineriartortitsinermik ilisimatusarpoq.
Taanna ukiumi kingullermi inuiaqatigiinni oqallittoqarnerani ilisimatusaatini pillugu aamma ukioq manna ilisimatusartut unammisinneqarneranni 'Paasisavut'-mi peqataanerminit maluginiarneqarpoq.
Naalakkersuisut siulittaasuata Múte B. Egedep siulersuisunut ilaasortaq nutaaq tikilluaqquaa:
- Ulunnguaq Great Greenlandimi siulersuisunut ilaasortatut misissueqqissaarnermik piginnaasaqarluarnermigut, tamakkiisumik immikkuualuttunillu isiginnissinnaassuseqarnermigut aamma inuiaqatigiinni kulturimilu pissutsinut patajaatsumik ilisimasaqarnermigut, ingerlatseqatigiiffiup periusissatut sammivianik ineriartortitsinermi aalajangersaanermullu iluaqutaalluarsinnaavoq, periusissallu malitseqartinneqarnissaanut, minnerunngitsumillu ingerlatseqatigiiffimmi naleqarnerulersitsinermik qulakkeerinneqataalluni. Tikilluarit!