Skip to main content

Great Greenland amissaaleqivoq

Ukioq manna naajartuleraluartoq, Great Greenlandip ukiumut ammit pisiortungassani pingajorarterutaasa aappaat tikingajallugit pisiortorsimavoq. Ammit amerlanerusut pisiortornissaat anguniarlugu tunitsiviit marluk maanna ammarneqarput.

Puisit amii katillugit 19.787-it Great Greenlandimut ukioq manna tunineqareersimapput. Qaammatip affaa avillugu qaangiuppat ukioq naasussanngoreermat, ukioq manna ammit pisiortugassat killigititaat, tassa ammit 30.000-it inorlugit pisiortortoqarnissaa naatsorsuutigineqartariaqarpoq.

Ammerivilli amernik amerlanerusunik pissarsisalernissaa anguniarlugu tunitsiviit marluk ammarneqalerput.

Inuussutissarsiornermut Naalakkersuisoq, Jens-Frederik Nielsen aalisarnermut, piniarnermut nunalerinermullu ataatsimiititaliamit 9. november ammasumik siunersiorneqarami taama ilisimatitsivoq.

Great Greenlandip pisortaa Preben Møller nassuiaavoq amernik tigooraavik Nuummi ammareertoq, Ilulissanilu ammaanissamut piareersagassat kingulliit naammassiniarneqartut.

Amernik tigooraaviit marluk nutaat isumalluartitsilerput:

- Isumalluarnarput. Suliffitsinnut ammit amerlanerusut tigorusuppagut. Tigooraaviit marlunnik ilanerisigut, amernik pilersorneqarnerunissaq siunertaavoq, Preben Møller oqaluttuarpoq.

Sumiiffiit ilaanni ammit ajortut

Great Greenlandip puisit amii 29.204-it siorna tunineqarput, suliffeqarfillu 800.000 koruuninik amigartooruteqarluni.

LÆS OGSÅ: Great Greenland amigartooqqippoq

Ammeriviup amminik ukioq manna pissarsinissaq ilungersuutigaa. Ammit ukioq manna pisiortugassatut killiliussat ataallugit maanna pisiortorsimalerpoq, ammimmi ilaat tunisassatut piukkunnarsimanngillat.

- Sumiiffiit ilaanni, soorlu kujataaniunerusoq, puisit pitsaanngitsumik ameqartut tusaqattaalerpagut. Tassa piniartut allatut ajornartumik puisit amii taamaattut igiinnartariaqartarpaat, Great Greenlandip pisortaa nassuiaavoq.

Akissarsiat isiginiarneqarput

Preben Møllerip naatsorsuutigaa amminik tigooraaviit marluk iluaqutigalugit Great Greenlandip ukiumut ammit pisiarisinnaasani, tassa ammit 30.000-it 2021-mi pisiarisinnaassallugit.

Inuussutissarsiornermut Naalakkersuisoq Jens-Frederik Nielsen ammasumik siunersiuinermi ilisimatitsivoq amminut tigooraavinni illuutit toqqorsiviillu pilersinnissaat ajornartorsiutaanerusimasut. Aammali tigooraaviit ilaanni sulisussanik suli atorfinitsitsiniartoqartoq.

Jens-Frederik Nielsen ilanngullugu ilisimatitsivoq "tunitsivinni tamani akissarsiat qaffanneqarnissaat maannakkut misissorneqartoq".

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER