Great Greenland 2021-mi sinneqartuulaarsimavoq

Great Greenland 2021-mi sinneqartuulaarsimagami suli ajunngitsumik ingerlavoq. Siulersuisut allamik ataatsimik ilaasortaqalerlutik ingerlaqqipput.

Great Greenland 2021-mi 14,7 millioner koruuninik kaaviiaartitaqarsimavoq, ukiup siuliani kaaviiaartitai 9,6 millioner koruuniusimasut.

Great Greenland 2020-mi fire millioner koruuninik sinneqartoorsimalluni siorna annikinnerulaanik angusaqarsimavoq.

Great Greenlandimit 2021-mi sinneqartoorutigineqalaarsimasut saqqummiunneqarsimapput.

Great Greenland 2021-mi sinneqartuulaarsimagami suli ajunngitsumik ingerlavoq. Siulersuisut allamik ataatsimik ilaasortaqalerlutik ingerlaqqipput.

Kaaviiaartitaqarnerulersimasoq

Suliffeqarfik 2021-mi 512.000 koruuninik sinneqartooruteqarsimavoq, taakku ukioq manna naatsorsuutinut ilanngunneqassapput. Nammineq aningaasaatai 20.250.668 koruuniupput.

Great Greenland ukiuni arlaqartuni amigartooruteqartareerluni ukiuni kingullerni marlunni sinneqartooruteqartarsimavoq.

Siulersuisuni siulittaasup Juliane Henningsenip nalunaaruteqarnermini pingaartllugu oqaatigaam tunisaqartarneq pitsaanerulersimasoq aamma naatsorsuutigisamit kaaviiaartitaqarnerusoqarsimasoq.

- Ukioq Coronaqarfioqqittoq Great Greenalandimut unammillernaqqissimavoq, ukumili tunisaqarluarnerusoqarsimavoq aamma piniartunit puisit amiinik pisiaqarluartoqarsimalluni. Kaaviiaartitat naatsorsuutigisamit pitsaanerusimapput, ukiumut missingersuusianit 50 %-it sinnerlugit kaaviiaartitaqarnerusimagami. Sinneqartooruteqarluni angusat kaaviiaartitaqarluarnerlu siulersuisunit naammagisimaarneqarluarput.

Ukiumi kaaviiaartitat 14, 7 millioner koruuniusimapput, ukiup siuliani 9,6 millioner koruuniusimallutik.

- 2021-mi naatsorsuutigineqarsimasutut pisiaqarluartoqarsimavoq. Immikkut pisassiissuteqartoqarsimavoq aamma ukiuusimavoq pisiaqarfiulluartoq, 32.000-it sinnilaarlugit pisiarineqarsimapput. Piniartut Great Greenland A/S-imut tunisaqarsimasut piniarluarsimaqaat. Kitaani aataat tunineqarnerpaasimapput, Juliane Henningsen nalunaaruteqarnermini oqarpoq.

Siulersuisunngortut

Juliane Henningsen (siulittaasoq)

Freddy Christensen

Niels Eli Boassen

Nikoline Zeimer

Louise Berthelsen

Aataat tunineqartut 2020-mi 14.210-usimariarlutik 2021-mi 24.061-iusimapput. Natsiit amii tunineqartut 901-inik ikilisimallutik 2021-mi 8.127-usimallutik.

Siulersuisut allamik ataatsimik ilaasortaqalerlutik ingerlaqqipput, Erik Sviertsen siulersuisunit tunuarusussimammat. Taanna Freddy Christensenimit taarserneqarpoq. Freddy Christensen ilaatigut Kommuni Kujallermi aamma Kommuni Qeqertalimmi atuarfeqarnermut atatillugu ataqatigiissaarisutut misilittagaqarpoq aamma Taermiut Campimik Qaqortumi piginnittuuvoq kiisalu Webdesign & Markedsføringimi freelanceritut sulisarluni.

Powered by Labrador CMS