Oscarinik nersornaasiinerit
'Gravity'-p Oscarinnannera nuannaarutigineqartoq
Filmi ilaatigut kalaallinit Otto Ignatiussenimit Juaaka Lyberthimillu peqataaffigineqartoq arfineq-marlunnik Oscarinik nersornaaserneqarpoq
Amerikarmiut filmiannut 'Gravity'-mut Otto Ignatiussenip Juaaka Lyberthillu nuannaarutigisinnaanngorpaat. Los Angelesimi Oscarinik nersornaasiinerni sapaatip unnukkuani ingerlanneqartumi arfineq-marlunnik Oscarinnammat.
Filmiliortartup Alfonso Cuarónsip filmiliaa 'Gravity' silaannarsuarmi pissanganartuliatut sanaavoq ilaatigut Sandra Bullock aamma George Clooney inuttaralugit.
Filmip Oscarinnaqattaarneranut Juaaka Lyberth Facebookikkut ilaatigut ima allappoq:
- Uaguk - Otto Ignatiussen uangalu - tulluusimaalaarnissatsinnut pissutissaqarpugut filmimut arfineq-marlunnik Oscarinnartumut annikikkaluaqisumik peqataanitsinnut. Filmip naggataani allagartalersornerani uanga 'Sinigit Meerannguamik' erinniortutut allassimasupalaavunga. Ajunngeqaaq.
'Gravity' silaannarsuarmi pisimasuutinneqarpoq, tassani astronauti nikeriarfeeroqqasoq malinnaaffigineqarluni. Filmimi pingaarnertut inuttaasoq Sandra Bullockip 'Aningaaq' - Otto Ignatiussenimut inuttaaffigineqarpoq - sikumiittoq radiokkut attaveqarfigileriasaarpaa.
Aningaaq tuluttoorsinnaanngilaq Sandra Bullockilu filmimi Dr. Ryan Stone-tut ateqartinneqartoq, kalaallisoorsinnaanani.
Otto Ignatiussenip filmimi oqaasii Oqaasileriffimmit Nuka Møllerimit nutserneqarput.
Filmip ingerlanerani Juaaka Lyberthip erinniaa 'Sinigit Meerannguaq' appinneqarpoq.