Grandpriximi saqqummiisoq: Ajugaassagaanni erinarsuut nuannersoq kisimi naammanngilaq

Pappiaraminernik kusassaatinut qamutilittaatit Herningimi Jyske Bank Boxenimi piareerneqarsimapput, unnugumi Melodi Grand Prix aallakaatinneqartussanngorpoq.

Unamminermi saqqummiisuussapput tv-kkut saqqummiisartoq Kristian Gintberg aamma erinarsortartoq Johannes Nymark, taanna melodigrandpriximi 2016-imi erinarsoqatigisani Lighthouse X peqatigalugit ajugaasimavoq.

Johannes Nymark danskit Melodi Grand Prixianni ukiut pingajussaat saqqummiisooqataassaaq, taassumallu oqarnera malillugu erinarsuut nuannersoq takutitsinerlu pitsaasoq kisimiunngillat ajugaatitsisussat.

Taanna isumaqarpoq peqataasussat qulit scenemut qaqigunik eqqissisimalluinnarnissaat aamma pingaaruteqartoq.

- Pingaaruteqarnerpaat ilagaat erinarsortussat qitittussallu scenemut qaqigunik eqqissisimalluinnarsinnaanissaat, oqarpoq nangillunilu:

- Scenemiinnermi eqqumaffiginiagassat amerlapput – erinarsuut, nipit, pujoq qitinnerlu – peqataasussallu ilarpassui taama angitigisumi siornatigut takutitsisimanngillat.

- Ilimagaara ingerlalluartut taakkuussasut scenemi eqqissisimasinnaasut, tamanna oqaannarnermit ajornarneruvoq, Johannes Nymark oqarpoq.

Dansk Melodi Grand Priximi peqataasussat nutaartaqarput ilisarnartoqarlutillu.

Tusaamaneqarnerit ilagaat 39-nik ukiulik Julie Berthelsen, taanna erinarsorluni unamminermi “Popstars”-imi 2002-mi ajugaasup tulliattut inissippoq tusaamasannguutigisaminik.

Julie Berthelsenip erinarsoqatigissavaa 41-nik ukiulik Nina Kreutzmann Jørgensen. Marluullutik erinarsortartutut imminnut Julie & Ninamik taapput, erinarsuullu "League of Light" atussallugu.

Tusaamaneqannginnerit ilaanniippoq Melodi Grand Priximi peqataasuni nukarlersaasoq, 20-nik ukiulik Leonora. Taanna siornatigut sukuutsertartutut unammisartuusimavoq, taassuma erinarsuut "Love is forever" atussavaa.

Aningaasanoornermi ajugaasussanik eqqoriaasartut sisamat, Unibet, Danske Spil, Bet365 aamma LeoVegas isumaqatigiilluinnarput, taakkumi isumaqarput Leonora aamma Julie & Nina ukioq manna Melodi Grand Priximi ajugaasinnaasutut ilimagineqartut.

Unammineq DR1-imi danskit nalunaaqutaat malillugu arfininngornermi 20:00 aallakaatinneqassaaq, saqqummiisussallu, Johannes Nymark aamma Kristian Gintberg, isiginnaartut sunik naatsorsuuteqarsinnaanersut pillugit oqaaseqarpallaarusunngillat.

Oqaluttuarpulli Melodi Grand Prixini peqataasarsimasuni eqqaamasariaqakkat ukioq manna nersorniarneqassasut.

- DR-p aalajangersimavaa saqqummiisussat inuusuttuussasut, taamaammat aamma aallakaatitsinermi tamanna malunnartinneqalaassaaq, Johannes Nymark oqarpoq.

- Tamanna malunnartissavarput Grand Priximi erinarsuutit eqqaamasagut saqqummiullugit.

Dansk Melodi Grand Prix 2019-imi ajugaasoq Danmark sinnerlugu Tel Avivimi maajimi Eurovisionimi peqataassaaq.