Grand Prix: Savalimmiormiumik siullerpaamik ajugaasoqartoq
Savalimmiormiu Rani Petersen, Reileyimik ilisimaneqarnerusoq, Danmarkimi Grand Priximik oqaluttuarisaanermut ilannguppoq Savalimmiormiuni ajugaasuni siullerpaatut. Rani Petersenip Danmark sinnerlugu Eurovision Song Contestimut peqataanissani maanna qilanaarilerpaa.
Savalimmiormiut arlallit Danmarkimi Grand Priximut peqataasarsimapput, maannali ajugaasoqarnissaata tungaanut ajugaanngisaannarsimallutik.
Grand Prix arfininngormat Næstvedimi ingerlanneqarmat 25-nik ukiulik, Reiley, erinarsukkani “Breaking my Heart” atorlugu, ajugaavoq. Taasinerit 43 procentii, isiginnaartartunit 15 procentit naliliisartunillu 28 procentit pissarsiaralugit, Reiley ajugaavoq.
Taamaalilluni Reiley Liverpoolimi Internationale Grand Prix maajimi ingerlanneqalerpat Danmark sinnerlugu peqataasussanngorpoq.
- Nuannisaqaanga. Oqiliallassimavunga suliaq sivisusimammat, aamma nuannaartorujussuuvunga, Reiley Kringvarp Føroyamut oqarpoq.
TikTok-imi tusaamasaq
Reiley Savalimmiuni peroriartorsimavoq, ulluinnarnili Londonimi najugaqarluni. Nipilersortartuuneralu ingerlalluarsimavoq. 2019-imi videoliani siulleq TikTok-imi saqqummersippaa, Reileyilu TitTok-imi ullumikkut 11 millioninik malinnaasoqarpoq.
Saqqummersitaani nuannarineqarnerpaaq tassaavoq “Let it ring”, Spotifymi 4 millionit sinnerlugit appisimaarneqarsimasoq Korea Kujallermilu nuannarineqartorujussuusoq.
Reiley 2019-imiilli Amerikamiut immiussisarfiannut Atlantic Recordsimut saqqummersitsinissamik aamma isumaqatigiissuteqarsimavoq.
- Eurovision Song Contestimut peqataarusussimavugut, nipilersukkanik suliaqarnerorusukkami nunanilu najugaqarfigisatsinni saqqummersitserusukkama, Reiley oqarpoq.
Isumalluartoq
Danmark Internationale Grand Priximi ukiuni kingullerni ingerlalluartarsimanngilaq, kisianni Reiley erinarsukkami ingerlalluarnissaanik ilimagisaqarpoq.
- Erinarsugaq nunat tamalaat akornanni nuannarineqarluartutut nipeqarpoq, nunallu tamarmik Europamiinnaanngitsorlu taasisinnaanerat iluaqutaasinnaavoq, malitserpassuaqarama, Reiley oqarpoq.
Danmarks Radio allappoq, immikkut ilisimasallit arlallit oqaloqatigineqarsimasut, taakkualu isumaqartut, erinarsugaq Eurovision Song Contestimi ajugaaniutivinnermut anngunnissamut ukioq manna periarfissaqarluartoq. Danmark 2019-imiilli ajugaaniutivinnermut anngussimanngilaq.
- Isumaqarpunga Reiley periarfissaqarluartoq, Liverpoolimi takutinneqartussatut neriuutigisannik. Ajugaaniutivinnermut inissamik neriorsuisinnaanngilanga, kisianni semifinalimiippugut pitsaasumik periarfissaqarfigisariaqakkatsinnik, tamanna oqaatigerusuppara, Simon Falk, nuannaartorinnittunut tusagassiuummi “Good Evening Europe”-mi tusagassiortuusoq, DR-imut oqarpoq.
Julie Berthelsen Nina Kreutzmann Jørgensenilu Melodi Grand Priximut 2019-imi peqataapput erinarsugaq League of Light atorlugu, taannalu isiginnaartartuni nuannaartorineqarluartutut normu 2-tut kusanavissumik inissippoq.
Savalimmiormiup ajugaassutaa uani tusarnaaruk: