GOSR-imi suliassat qulakkeerneqassapput - atorfilittat siulersuisuni nutaani inuttarineqalerput
Greenland Oil Spill Response uuliasiortoqartarneranit isertitsissaarsimavoq, taamaammallu ingerlatseqatigiiffimmi suliassat allatut qulakkeerneqassapput. Ingerlatseqatigiiffilli 2021-mi kaaviiaartitaqarnerulersimasoq, naatsorsuutini takuneqarsinnaavoq. Atorfilittat siulersuisuni inuttarineqalerput.
Namminersorlutik Oqartussat ingerlatseqatigiiffiutaat 2020-mi 78.713 koruuninik sinneqartooruteqarsimalluni, 2021-mi 71.101 koruuninik amigartooruteqarsimavoq. Akerlianik 2020-mi kaaviiaartitaqarisimasai 4 millioner koruuniusimasut amerlanerulerlutik 2021-mi 4,6 millioner koruuniulersimapput.
Nammineq aningaasaatai 11 millioner koruunit missaanniitilerlugit nalikillineqarsimapput, naatsorsuutini saqqummiunneqaqqammersuni tamanna atuarneqarsinnaavoq.
Greenland Oil Spill Response (GOSR) uuliamik mingutsitsisoqarsinnaaneranut upalungaarsimanermik aamma aatsitassarsiornerup iluani avatangiisinik saliisarnissamik ingerlatsisussatut pilersinneqarsimavoq, ingerlatseqatigiiffiillu Kalaallit Nunaanni uuliasiortartut GOSR-imut tapiissuteqartartussaallutik.
Ingerlatseqatigiiffik kaaviiaartitaqarnerulersimagaluartoq, GOSR-ip siunissaa qulakkeerniarlugu iliuuseqartoqartariaqarsimavoq.
Misissuisoqarsimaneranit ukiumi siullermeersumik isertitaqarsimannginneq
2021-mi isertitaasa annerpaartaat Illersornissaqarfiup Namminersorlutillu Oqartussat isumaqatigiissutaanneersuusimapput, tassa GOSR imaani mingutsitsisoqarsinnaaneranik akiuiniarnerup pitsanngorsaaffigineqarneranut ikuisimagami, suliffeqarfiullu siunissami suliassaqartarnissaanut tamanna naammanngitsoq, ingerlatseqatigiiffimmi siulersuisut naatsorsuutini allapput:
- Naalakkersuisut Illersornissaqarfiullu Greenland Oil Spill Response A/S pillugu isumaqatigiissutaat inissisimaneranut pitsaasumik iluaqutaassaaq, GOSR-illi aningaasaqarnikkut inissisimaneranut tamanna iluaqutaavallaassangunarani. Taamaammat pingaaruteqarluinnarpoq, GOSR-ip ukiuni aggersuni qaninnermi suliassaqarnissaa qulakkeerniarlugu suliniutinik allanik aallartitsisoqarnissaa.
Ingerlatseqatigiiffiup taamatut inissisimaneranut nunami maani ukiut kingulliit ingerlaneranni uuliasiornissamik soqutiginnittoqarsimannginnera kiisalu uuliasornerup tamarmiusup unitsinneqarnissaanik Naalakkersuisut siorna aasakkut aalajangersimanerat pissutaapput.
Ukioq 2021 taamaalilluni ukiuuvoq siulleq ingerlatseqatigiiffiup uuliasiortoqarneranit isertitaqanngitsoorfigisimasaa.
Umiiartoqarnerni atortussanik tunniussisimasoq
Nunami maani uuliasiortoqanngikkaluartoq ingerlatseqatigiiffik suliassaqarsimavoq. GOSR ilaatigut kilisaat Polar Aassik siorna martsip qaammataani Qasigiannguit avataanni ikuallallunilu kivimmat atortunik sulisussanillu isumannaarinnissimavoq, aamma Amerikap avannaamut umiarsuaataat sineriammi nakkutilliisartut pingasut orsersornerannut atatillugu Nuup umiarsualiviani puttasunik assersuisimavoq.
GOSR tamakkua saniatigut Issittumi Sakkutooqarfiup sungiusarnerinut arlalinnut peqataasimavoq.
Suliakkiutigineqarsimasut takutippaat GOSR-ip piginnaasai sulisuilu suli pisariaqartinneqartut, naatsorsuutini allassimavoq. GOSR-ip isumalluutini namminneq piumassutsimik nakkutilliisoqartarnerup annertusarneqarnissaanut ineriartortinneqarnissaanullu suli atortarniarpai.
Siulersuisut nutaat atorfilittanik inuttaqartinneqartut
Ingerlatseqatigiiffik atortorissaarutit aqqutigalugit ataasinngornermi ataatsimeersuarmat nutaanik siulersuisoqalerpoq. Siulersuisut nutaat Namminersorlutik Oqartussani atorfilinnik inuttaqartinneqalerput, tassan Hans-Peder Barlach siulersuisuni siulittaasunngorluni. Hans-Peder Barlach Naalakkersuisut Siulittaasuata Naalakkersuisoqarfiani pisortaavoq.
Siulersuisuni ilaasortat allat marluk tassaapput Ineqarnermut Attaveqaasersuutinullu Naalakkersuisoqarfimmi pisortaq Ruth Lindhardt kiisalu Aningasaqarnermut Naligiissitaanermullu Naalakkersuisoqarfimmi pisortaq Nikolaj S. Christensen.