Island Games
Golfertartut tupaallatsitsiinnarsinnaapput
Kalaallit Nunaat Island Gamesimi golfertartunik pingasunik peqataatitaqarpoq
Nuummi sila pissutigalugu golftertartut illup iluani golfertuusaartarfimmi sungiusartarsimapput.
Taamaattumik golfertartut pingasut Jan Rasmussen, Lars-Karl Johansson aamma Rasmus Ryvold Island Gamesimut, Jerseymi ingerlanneqartumut, imatorsuaq isumalluanngillat.
– Maaniippugut sapinngisarput tamaat unamminiarluta. Holdikkaarluni unamminermi kingullerpaatut inissinneqarsimavugut, holdikkaarlunilu unamminermi nunat allat marluk-pingasut puaatsoortinniassavagut, Jan Rasmussen Sermitsiaq.AG-mut oqarpoq.
Timersortartut unammiuaarnersuanni golfimik unammiuaarnermi Kalaallit Nunaat aapassaa peqataatitaqarpoq.
– Anguniarparput ataaasiakkaarluni unamminermi kakkannerit 50-it akornanniinnissarput. Pingaarnertullu anguniarparput kingullerpaanngunnginnissaq imaluunniit kingullerpaamut tullinngornissaq, Jan Rasmussen oqarpoq.
– Golf timersuutaavoq alutornartoq. Anaasinerup ataatsip runde tamaat aserorsinnaavaa. Akerlianik torrallavillugu anaasinermi misigisaq oqaatigineqarsinnaanngilaq, Jan Rasmussen oqarpoq.
Golfernermi angusat Sermitsiaq.AG-p tallimanngorpat ilanngutissavai