Skip to main content

GOG slutspillimi aallartilluarpoq

Danmarkimi assammik arsarluni pissartanngorniunnermi slutspillimi unamminermi siullermi tamaviaarfiusumi pissanganartumilu GOG ajugaavoq

Arfininngormat ualikkut GOG Arena-mi isiginnaartut 1200-t misigissutsit tamaasa atorpaat, arfininngormat GOG-p aamma Team Tvis Holstebro-p unammineranni sekundit 22-t sinneruttut eqqissiallaatigalugu takugamikku Minik Dahl Høegh qummut pisseriarluni sakkortuumik isertitsilluni GOG 29-27-mik siuartikkaa, taamaasillunilu GOG qallunaat pissartanngorniunneranni slutspillimi pointit pingaarutilerujussuit marluk pissarsiarai.
Unammineq aallaqqaataanilli pissanganartorujussuuvoq. Tikeraat aallartilluarnerupput. Aammami Holstebro-mit Fynip kujataanut sivisuumik biilersimapput marlunnik pointinnanniariartorlutik, soorunamilu Klaus Bruun Jørgensenip unammisartuisa ajugaanissaat ilimagineqarneruvoq. GOG-p unammisartui unamminerup aallaqqaataani annilaangarpasipput, Team Tvis Holstebro-lu 5-8-mik siuarpoq. Sungiusaasuuneq Jakob Larsen holdimi allannguivoq, taavalu GOG arsarlualerpoq. Taavalu 8-8-mut anngupput. Unamminerup immikkoortuani siullermi, 11-10-mik inerneqartumi, Minik Dahl Høegh aamma Akutaaneq Kreutzmann isertitsipput.
Unamminerup immikkoortuata aappaani fynimiut assammik arsarnermik takutitsinertik nangippaat. Akutaaneq Kreutzmann aappassaanik isertitsilluni 15-12-imut siuartitsimmat isumalluarnarsiartorpoq. Tamanna ingerlaannarpoq GOG-lu 23-16-imik siuarluarpoq. Team Tvis Holstebro tulleriisiinnarlugu tallimanik isertitsimmat unammineq allanngoqqippoq, unammisartullu isiginnaartorpassuillu pissanganartumik naggataarput, qanorluunniit pisoqarsinnaalluni, sekundit 22-t sinneruttut Minik Dahl Høeghip eqqissiallannartumik 29-27-mut isertitsinissaata tungaanut. Unamminerup sekundiini kingullerni GOG isertitseqqippoq 30-27-millu ajugaalluni.

Kalaallit tallimanik isertitsipput
Minik Dahl Høegh pingasunik Akutaaneq Kreutzmannilu marlunnik isertitsipput. Unamminerup kinguninngua Sermitsiaq.AG-p Akutaaneq Kreutzmann oqaloqatigaa.
– Ajugaanerput nuanneqaaq, soorunamilu pingaaruteqartorujussuuvoq slutspillimi aallartilluarnerput. Ilami holdi qaffannikuuvugut, holdimilu amerlaqaagut taama qaffasitsigisumi unammisimanngisaannartut, taamaattumik pitsaaneruvallaarsinnaanngilaq. Pingasunngorpat Skjern-imut unamminissarput qilanaaraara.

Sungiusaasoq tulluusimaarpoq
Unamminerup pisoqarfioqisup pissanganartullu kingorna sungiusaasuuneq Jakob Larsen ersarissumik oqiliallassimarpasippoq.
– Sorpassuit eqqortumik iliorfigaavut. Piffiup ilaani ingerlalluaqaagut, isiginnaartorpassuarnit tamakkiisumik tapersersorneqarluta. Assammik arsarneq pitsaanerpaajugaangat. Ajoraluartumik unamminerup immikkoortuata aappaata naajartulernerani annilaangalaaleraluarpugut, pisariaqanngitsumillu pissanganartorujussuanngoraluarpoq. Aappaatigulli eqqaamassavarput Team Tvis Holstebro unammisartorissaaqimmat. Slutpillimi 12 pointit unammissutigaavut, ullumikkullu ajugaanitsigut suut tamarmik ammapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER