Skip to main content

GOG-ip Mors-Thymut unammineranit assilisat

GOG arfininngornermi ualikkut tulleriiginnaat sisamassaanni pointinanngitsoorpoq

GOG ukiumi unammisaqattaarfiusumi kingullermi ingerlalluartoq assammillu arsarnermik kusanartumik aliikkutaalluartumillu takutitsisarnermigut tamanut alutorsartitsisoq ukiup unammisaqattaarfiusup matuma aallartinnerani ajornartorsiulaavissorpoq.

Jakob Larsenip unammisartui unamminerit tamaasa sakkortunerpaamik tatineqartarput unamminernilu arlalinni pitsaassuseqarluartunik isertitseriarnissaq ajornartorsiutigisorujussuusarlugu. GOG Arenami arfininngornermi ualikkut taama pisoqaqqippoq, unammisaat Mors-Thy Håndbold minutsit siullit aqqaneq-marluk ingerlariiginnartullu 2-8-mik siuarmata. GOG-ip pingajussaanik isertitaqarnissaanut minutsit suli allat marluk ingerlapput Fynimiullu unillatsiarnermi 9-16-imik kinguaqqallutik.

Immikkoortut aappaat

GOG immikkoortut aappaata aallartinnerani ingerlalluarneruvoq iluatsitsinerulaarlunilu pitsaanerusumik isertitseriartarsimasuuguni unamminermut peqataaqqilersimassagaluarluni. Mors-Thyp målmandiata Dane Sijanip takutitsilluarneratigut, tunioraannerpassuit iluatsinngitsoortarnerisigut, straffemi isertitseriarnerit iluatsinngitsoortarnerisigut GOG-milu målmandit annaassisarnerisa ikippallaarnerisigut unamminerup qanoq inerneqarnissaa pissanganarsinngisaannarpoq. Ligamisut qaffasissusilimmik assammik arsarnermi isertitseriarnerit pitsaanngitsut pillarneqaataasarput, GOG-mullu taama pisoqaqqippoq, Mors-Thy 27-30-mik qularnaatsumik ajugaammat.

Minik Dahl Høegh tupatsitaasoq

Minik Dahl Høegh immikkoortut aappaata aallartinnerani akulloqqunnermini sakkortuallaarujussuartumik unitsinneqarpoq. Assersuisoq Jesper Meinby minutsini marlunni anigallartariaqalerpoq Minik Dahl Høeghilu tagiartuisartumit nakorsamillu passunneqartariaqalerluni.

Minik tuparujussuaannarpoq mattusersorneqareeramilu unamminermi minutsini qulini kingullerni peqataalluni.

Tatisimaneqarpugut

Sungiusaasuunerup Jakob Larsenip sa- paatip-akunnerisa aggersut unammisartunut sakkortunissaat pointinnanniarlunilu tamaviaartariaqarnissaq qularutiginngilluinnarpaa.

- Ajuutsitsinaveersaartut iluatsinneq ajulivipppavut. Annaassisarnivut ikippallaarput. Unamminerup aallartinnerani annaassisoqanngitsuuilluni. Assersuisullu aallartilluanngitsoortillugit nalornineq saassussisarnermut siaruaattarpoq, qaangeruminaatsumillu nalornisoorfiulersarluni. Naggataatigut aatsaat qasukkaamivugut, isertitsisalerlutalu. Ajoraluartumilli kingusinaarluta.

Akutaaneq Kreutzmann aamma Minik Dahl Høegh tamarmik immikkut maroriarlutik isertitsipput. GOG arfininngornermi unammisoqareermat sisamaannarnik pointinnassimalluni normu 10-tut inissisimavoq. Siuttuusut tassaapput KIF Kolding København 13 pointinnassimasut. GOG pingasunngorpat unammeqassaaq, Skjernimut ajornakusoortumik unammiartortoqassalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER