Skip to main content

GOG ingerlalluaqaaq

Slutspillimi unamminerni pingasuni ajugaasareerluni GOG qallunaat pissartanngorniunneranni siuttuuvoq

Fynip kujataamiut qaffannikut ingerlalluarnermikkut tupaallatsitsiuaannavipput. Skjern Håndbold aamma Team Tvis Holstebro ajugaalluarfigisareerlugit tallimanngormat ualikkut Århus Håndbold ajugaaffigaat. Unamminermi ingerlalluanngikkaluartumi pikkunaqisumili fynimiut 27-30-mik ajugaapput.
Unammineq ingerlanneqarpoq unammisarfitoqqami oqaluttuassartaqarluartumi Århus Stadionhal-imi, ukiut tusintit nikinnerisa missaanili unammisartunik kakkannernik unammiffigineqarsimanngitsumi.
– Maanna kiisami unammisarfivimmi assammik arsaatissaagut, unamminissaq sioqqullugu århusimiu utoqqasaaq isertarfiup saavani Sermitsiaq.AG-mut oqarpoq.
– Taava ullut pilluarnartut eqqaassavagut, taamani Århus Danmarkimi assammik arsartartuni kakkannerni klubbinik sisamanik peqataatitaqarallarmat.

Tamaviaarnaqaaq
Ajugaanissarli sioqqullugu GOG-ip unammisartui ilaanneeriarlutik annilaangarpasikujuttartut fynimiullu illersortaat angalaqataasut 200-t missaanniittut pissanganartorsiortinneqarluarput. Århus Håndbold-ip sungiusaasuata assammik arsallammassuunikup Erik Veje Rasmussenip pisarnermisut sorpassuit atorlugit unammisartuni ajugaatinniarsarai. Pisarnermisut piffissap ilarujussuani målmandi anisillugu avataani unammisartut amerlisittarpai.
Tamannali iluaqutaanngilaq, GOG-miullu aalassarissut målmandeqanngimmat ajornanngitsumik isertitsillattaarput. Dommerit marluk pisut aqukkuminaatsippaat. GOG aallartinnerliulaariarluni muminnermi 14-15-imik siuarsimapput.
Unamminerup immikkoortuata aappaani fynimiut siuariangajattaraluarput, tamatigulli anisitaanermik eqqorneqartarlutik. Katillugit arfineq-marloriarlutik anisitaasoqarput, taamaattumik fynimiut minutsini 14-ini ikinnerussuteqarsimapput. Minutsit tallimat sinneruttut 26-28-imik isertitsisoqareersoq sungiusaasoq Jakob Larsen kingullermik time-out-erpoq. Unammisartut eqqissitillugit. Målmandi taarserlugu, taavalu fyninmiut qularnaatsumik 27-30-mik ajugaapput. Siusinnerusorpassuarni pisarnertut GOG-p unammisartuisa tamatiguussusiat aalajangiisuulluinnarpoq. Isertitat 30-t unammisartunit 12-nit isertinneqarput.

Kalaallit unammilluarput
Minik Dahl Høegh aamma Akutaaneq Kreutzmann marluullutik unammilluarput. Minik Dahl Høegh pisarnermisut maligassiulluarpoq. Torrallavillugit pingaaruteqaqisunllu sisamanik isertitsivoq.
Akutaaneq Kreutzmann ataatsimik isertitsivoq pisarnermisullu arlaleriarluni piginnaasaqarluarnini takutittarlugu. Håndboldliga-mi sæsoni ataasiinnaq unammisarsimalluni ilaanneeriarluni unammisartuissuartut misilittagalittut takutitsisarpoq.
Årus Håndbold-imi unammisartut ilagaat Aqqaluk Sørensen. Aqqaluk Sørensen kissasseraluarpoq. Avalatsitaanngiarli. Seeqqumigut ajoqutitoqqani suli ippinnartoqartissimavasa.

Aqqutaa takeqaaq
GOG slutspillimi siuttuulluni inissisimalluaraluartoq semifinalimut aqqut suli takeqaaq. Sungiusaasuuneq Jakob Larsen silatusaaqqusivoq, ilaatigullu Sermitsiaq.AG-mut imatut oqarluni:
– Oqartuaannarsimavunga semifinalimut anngutissagaluaraanni pointerpassuit pisariaqartut, tamannalu eqqorpoq. Suli pingasoriarluta unammisussaavugut, semifinalimullu anngunnissarput qulakkiissagutsigu marlunni ajugaasariaqarpugut, unammisassavullu tassaammata Skjern Håndbold Team Tvis Holstebro-lu aammalu Århus Håndbold unammeqqillugu, suliassaq imaannaanngitsuuvoq. Ajoraluartumik Skjern Håndbold-imit aamma Team Tvis Holstebro-mit ajornakusoortitsineruvut, tassa grundspillimi uagutsinnit inissisimalluarnerusimagamik slutspillimut pointinik nassataqaramik.
– Pisarnertut unamminerit ataasiakkaarlugit sammissavagut. Peqataanerput nuannareqaarput takussavarpullu qanoq angusaqarumaarnerluta, Jakob Larsen Sermitsiaq.AG-mut oqarpoq.
 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER