Ajorsaqqipput
GOG ajorsaqqippoq
Minik Dahl Høegh Akutaaneqa Kreuzmannilu assammik arsarnermi pingasunngornermi unamminermi ajorsaqqipput
Juullip siuliani unillatsiannginnermi GOG Håndbold Liga-mi ingerlalluaraluarpoq, ajugaasaqattaaraluarpummi, allaat siuttunut ilaaleraluarlutik. Unamminerilli kingulliit sisamani maannakkut ajorsarnikuupput. Danmarkimi pissartanngorniunnermut anngutissagunik unamminerni tulliuttuni pingasuni ajugaasariaqarput.
Pikkorissunoorput
GOG Team Tvis Holstebromut unamminermini ajorsaqqippoq. Team Tvis Holstebro 24-26-mik ajugaapput muminnermi 10-15-imik siuaqqallutik. Unammineq pissanganarpallaanngilaq, tassami Team Tvis Holstebro tallimanik siuaqqanngikkunik arfineq-marlunnik siuaqqasaramik.
GOG-mi sungiusaasup Jakob Larsenip unammisartuni taarseraakkaluarpai iluatsinngitsumik. GOG Team Tvis Holstebrolu unamminerni marlunni siuliini GOG ajorsarnikuunngimmat, Team Tvis Holstebro sukataarluaqaat.
Minik Dahl Høegh Akutaaneq Kreutzmannilu unammeqataagaluarput. Team Tvis Holstebroli unamminermi illersuilluaqaat, kalaallit isertitseriarnissaannut periarfissiinngingajallutik. Minik Dahl Høegh unamminermi orlunini malugaa, unamminermilu ilaaqqippianngitsoorluni. Kalaallit marluullutik pingasoraarput.
Pissartanngorniunneq
GOG-ip unammeriaasigisartagaanut ilikkarneqarsimallutik Jakob Larsenip malugaa.
- Unammeqattaarnerit aallartimmata tupaallatitseqattaarpugut, unammisaqattaarnerilli ingerlaneranni qanoq unammeriaaseqarnersugut unammisatta sungiuttalerpaat. Qanoq iliuuseqartarnersugut marserluarneqarsimavoq.
- Tamanna utoqqatsissutaanngilarli. Saassussinermili aqutsisorisartagarput Snorri Gudjohnsson EM-imit ajoqquseqqalluni angerlarpoq, Minik suli pikkorinnerpaaffini tikinngilaa. Iserteriakkallu isertinneqartannginneri ajorsarnitsinnut peqqutaapput, Jakob Larsen Sermitsiaq.AG.mut oqarpoq.
GOG pikkorinnerit tallimat iluanniipput suli, unammillertulli qanilliartuinnavipput. Pikkorinnerit arfineq-pingasut akornanni inississinnaagunik Danmarkimi pissartanngorniutivinnissanut anngutissapput. Unammeqattaarnernut peqataassagunik aningaasaqarnikkut ingerlalluarnerulersinnaassapput. GOG-p pissartanngorniutivinnissanut anngunnissani unammisaqattaarnerit aallartimmatali tikinniarsaraat.