Kajumissaaneq

Godtfredsen: Inuusuttut ilinnialeqqinneq ajortut iliuuseqarfigisigit

Timi Asimi ingerlatsisup, Kim Godtfredsenip, inuusuttut meeqqat atuarfiat naammassigaangamikku ilinnialeqqinneq ajortut iliuuseqarfigeqqullugit politikerit kajumissaarpai

Timi Asimi aqutsisoq, Kim Godtfredsen, inuusuttunut iliuuseqartoqarnissaa ujartuivoq

Meeqqat atuarfianni atuartut 715-it nalunaarsorneqarsimasut ukioq manna atuarfik qimappaat, taakkunanngalu 329-it ilinniakkamik aallartitsinngillat. Tamanna Anthon Frederiksenip ukiaanerani paragraf 37 naapertorlugu apeqqutaata akineqarnerani ilisimatitsissutigineqarpoq.

Inuusuttuararpassuit ilinniakkamik aallartitsinngittarnerat, Kim Godtfredsenimit inuusuttunut suliniummit Timi Asimeersumit oqaaseqarfigineqarpoq.

Aamma atuaruk: Inuusuttut meeqqat atuarfianit anereerlutik unittoortartut amerlavallaaqaat

Qaartartoq qaartussaq
- 329 kisitsisaavoq, kisitsisillu tunuaniippoq inuk inuusuttoq, ilaqutariit amerlasuutigullu alianartunik pisoqarsimasarluni. 46 procentit ingerlaqqinngillat. Ukioq 2012 44 procentimiippoq. Tassa imaappoq, allanngortoqarpiarsimanngilaq siunissamilu ajornartorsiut qaartussaavoq.

Kim Godtrfedsen inuusuttunik sullitaqartoq, ajornartorsiummut taama oqaaseqarpoq.

- Inuusuttut imminut paarisinnaanngitsut pineqarput, imaluunniit angajoqqaat arlaatigut napparsimasut, atornerluisut, avinnikut meeqqaminnik paarsisinnanngitsut, Kim Godtfredsen allappoq.

lliuusissamik ujartuisoq
Taanna pisortat tungaannit ikiortissanik aamma iliuusissamik pilersaarummik taakkununnga inuusuttunut ilaqutaariinnullu ujartuivoq.

- Kommunit aamma Namminersorlutik Oqartussat Piareersarfiillu suliaq tamaat iluarsisinnaanngilaat. Suliassarujussuuvoq annertooq, qinneq naanertaqanngitsoq, suliuniummik ingerlatsisoq oqarpoq.

Taassuma erseqqissarpaa, soorunami Timi Asimimit ajornartorsiut tamaat aamma iluarsineqarsinnaanngitsoq, kisianni kivitseqataanissamut akisussaaffimmillu tigusinissamut piareersimavoq, siunissamilu ataatsimut pitsaanerusumik ilisimasaqarnissaq, minnerunngitsumillu inuusuttunut ilinnialeqqinneq ajortunut iliuusissatut pilersaarummik qulakkeereqataaniarpoq.

- Piffissanngorpoq pisortanit ajornartorsiut iluamik tiguneqarnissaa, Kim Godtfredsen naggasiivoq.

Powered by Labrador CMS