GM: KAK partiinik ataatsimeeqateqarsimasoq
COVID-19-ip kingunerisaanik nunatsinni timersornikkut ulluni makkunani qaammatinilu kingullerni qanoq inissisimasoqarnera pillugu KAK-p partiit tamaasa oqalliseqatigiumallugit tallimanngornermi juulip ulluisa 24-anni ataatsimiinnissamut aggersarsimavai.
KAK, Kalaallit Nunaanni Arsaattarttut Kattuffiat, qaammatit kingulliit arlallit ingerlaneranni, arsamik nunatsinni pissartarnngorniunnissap pilesaarutit malillugit ingerlanneqarsinnaaneranut aaqqiissutissarsiorluni suliaqarsimavoq. Pissartanngorniussat aallaqqaammut aggustusip qaammataanut kinguartinneqaraluarput. Pissartanngorniunnissalli ingerlanneqarsinnaanerat qularnarsisimavoq, Naalakkesuisut katersuuteqqusinnginneq ukiup naananeranut sivitsormassuk.
KAK-mit partiimi siulittaasut maanna oqaloqatigineqarput, tassani attanneqarsinnaasumik aaqqiissutissarsiorniarluni aamma Namminersorlutik Oqartussanik oqaloqatiginninniarluni.
- Inuit akisussaassuseqarluartut akisussaassuseqartumik aaqqissuusserisuttut matumani pineqarput. Malittarisassat malitassatik isummerfigisassatillu pillugit aaqqiissuteqarnissamut piareeqqapput, Tillie Martinussen KAK-mik ataatsimeeqateqarnermut peqataasimasoq oqarpoq, nangillunilu:
- Pitsaanerusumik oqaloqatiginneriaaseqartoqartariaqarpoq, maannakkutummi isikkoqartillugu, oqaloqatigiinnermi arlaat paatsuugaqarsimagunarpoq, taanna oqarpoq.
Bilitsit akitsoriartortut
KAK Facebookimini ilisimatitsivoq, oqaloqatiginninniarsarinertik ingerlatiinnarniarlugu:
- Nunatsinni pissartanngorniunnerit ingerlanneqarnissaat sulissutigaarput, aammalu illuatungeriinnik tamanik oqaloqatiginninniarlutalu politikkerinik qullersanillu oqaloqatiginninniarsimavugut, KAK-mi siulersuisut siulittaasuat Finn Meinel oqarpoq.
Katersuuteqqusinnginneq arsamik pissartanngorniunnissamut kisimi aporfiunngilaq. Aamma bilitsit akii ullormiit ullormut qaffattarput, tamannalu klubbinut naggataatigut akisoorujussuanngorsinnaavoq, Inatsisartuni ilaasortaq Tillie Martinussen oqarpoq.
Oqaloqatigiittoqanngitsoq
KAK-mit pissartanngorniuttoqarsinnaanera pillugu Namminersorlutik Oqartussanik oqaloqatiginninniarneq suli iluatsinneqanngilaq.
Politikkerit naalakkersuisooqatigiit partiianneersut arsaattartullu, Namminersorlutik Oqartussat arsamik Kalaallit Nunaanni pissartarnngorniuttoqarnissaanut aaqqiissutissarsiorusunnginnerat isornartorsiorsimavaat.
- Naatsumik oqaatigalugu pissutsit maanna taamaatsillugit KAK nunatsinni pissartanngorniuttoqarsinnaanissaanut aaqqiissutissanik ujarlerluni suliaqarpoq, maannamullu suliarisimasagut nangillugit suliaqaqqissaagut. KAK aalajangiisuunani Naalakkersuisulli nunatsinni pissartanngorniuttoqarnissaata piviusunngortinneqarnissaanut aalajangiisussaanerat erseqqissaatigisariaqarparput, Lars Jørgen Petersen KAK-ip allaffeqarfiani aqutsisuusoq taama oqarpoq.
Partiini aqutsisut tamarmik KAK-p tallimanngormat juulip 24-anni ataatsimiissaanut qaaqquneqarsimapput. IA-mi siulittaasoq Muté B. Egede, Suleqatigiissitsisuni siulittaasoq Tillie Martinussen aamma Partii Naleraq sinnerlugu Pele Broberg ataatsimeeqataapput. Partiit Naalakkersuisuutitaqartut arlaannaalluunniit ataatsimeeqatigiinnermut peqataatitaqanngillat.