Skip to main content

GME: Kuannersuit niuerfissatsialaanerulerpoq

Narsap eqqaani Kuannersuarni aatsitassanik qaqutigoortunik piiaanermi aatsitassanik pitsaanerusumik atorluaaneq aamma sanaartornermut aningaasartuutit ikinnerit.

Greenland Minerals Ltd, ukiorpassuarni Narsap eqqaani Kuannersuarni aatsitassanik qaqutigoortunik aatsitassarsiorfimmik ineriartortitsilluni suliniuteqartoq, aningaasaliisartunut nutaarsiassatsialaateqarpoq.

Aatsitassarsiornermik suliniummi pilersaarummut aningaasartuutit 40 procentinik annikillisinneqarnissaat ingerlatseqatigiiffiup iluatsippaa, Greenland Minerals tusagassiuutinut nalunaarummi taama oqaluttarpoq.

Milliardinik sipaaruteqarneq

Taakku suliniummut aningaasartuutit katinneri 832 millionit dollarininngaanniit (5,5 milliardit danskit koruunit missaannit) 505 millionit dollarinut (3,4 milliardit koruunit missaannut). Aatsitassarsiorfissami pilersaarutaasumi teknologiip ineriartortinneqarneratigut sipaarutit pilersinneqarput, atuilluarnerup qaffasinnerulersinneratigut.

Ineriartortitsinermik suliaqarneq Greenland Mineralsip aningaasaliisuini annerpaaq aamma suleqataa, Kinamiittoq Shenghe Resources Holding Ltd., suleqatigalugu tamanna pivoq, taanna aatsitassanik qaqutigoortunik tunisassiortut annersaasut ilagaat.

Atuilluarnerup annertusineqarnerata saniatigut ineriartortitsinikkut aamma piiaanertaa pisariillisinneqarpoq, taamaalilluni sanaartornermi nukiit ikinnerusut atorneqassallutik. Aammattaaq umiarsualivimmi, aatsitassat umiarsuarmut issoraanneqarfigisartagassaanni sipaarutissarsisoqarsimavoq, Greenland Minerals tusagassiuutinut nalunaarummi allappoq.

Greenland Minerals aatsitassarsiorfiup ukiuni 37-ni atuunnissaanik missingiuteqarluni naatorsuisimavoq.

Uran saniatigoorineqarpoq

Aatsitassat qaqutigoortut ilaatigut batteerini atorneqartarput, skærmit elektroniskiusut qalipaatinitsittarpaat, vibratorini aamma mikrofonini tusarnaarutinilu kajungerisartuni ilaasarput. Kuannersuit nunarsuarmi aatsitassanik qaqutigoortoqarnersaat ilagaat.

Kuannersuarni aatsitassanik qaqutigoortoqarnerisa ajornartorsiutit annersaat ilaat tassaavoq, piiaanermi urani saniatigooralugu piiarneqartussaanera. Uranimik piiaanngilluinnarnissaq Inatsisartut 2016-imi atorunnaarsissallugu aalajangermassuk, anigorniagassa taanna qaangerneqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER