GM: Allat pissartanngorsinnaaneri ilimagigai
Assammik arsarluni pissartanngorniunnermut maannamut unamminerit pissanganarlutillu isiginnaaruminarput – arnani angutinilu. Ullumi pissartanngorniunnissanut qilanaartoq TAAK-p siulittaasua taama isumaqarpoq, ukiunilu 13-ini kingullerni pissartaasartut allanngorsinnaanera ilimagalugu.
Kalaallit Nunaanni pissartanngorniunnerni ukiut qulit sinnerlugit pitsaanerusarput, angutilli assammik arsarlutik pissartanngorniunnerani GSS-p nalunaaqutaq 17.15 NÛK unammileruniuk ajorsartitaaratarsinnaavoq.
GSS pitsaasorujussuuvoq. Minnerunngitsumik ukioq manna unammisaqattaarnermi holdinit allanit unammillerneqartarnermini, assammik arsartartut peqatigiiffianni TAAK-mi siulittaasoq Carsten Olsen oqarpoq.
- Unnugu pissartanngorniunnissaq pissanganartorujussuuvoq, siulittaasoq naliliivoq. NÛK-llu GSS unamminerni siullerni ajugaaffigisimagaa eqqaallugu.
- Nalunngilara unamminerni siullerni pissartanngorniunnermilu pisut assigiinneq ajortut.
- Ajugaaffigisassaanngillat
Taamaakkaluartoq NÛK pissartanngoraluarpata tupaallannassagaluarpoq.
- GSS ukiuni 13-ini pissartaasaqattaarpoq, sulilu inissisimanerat nukittulluni, Carsten Olsen oqarpoq.
Arnani GSS aamma taama inissisimasoq ilanngullugu oqarpoq.
- Ajugaaffigisassaanngillat. Iligiit tamarluinnangajammik nunanut allanut unammisartuupput, qaammallu qaangiummat VM-imut anngunniuttussaallutik, taamaammat qasujaanneri tupinnanngilaq, nassuiaavoq, ualerulu NÛK-mut nalunaaqutaq 15:30 unammilerunik ajugaanissaat ilimaginerarlugu.
Nutaaliortut
GM-ertoqarnera TAAK-mi siulittaasup maannamut ajunngitsumik ingerlasutut nalilerpaa.
- NÛK ajunngitsumik takutitsivoq. Unammisaqattaarnerit ajunngitsumik ingerlanneqarnissaat qulakkeersimavaat. Young Guns Futsalimik ikioqateqarlutik nutaaliornertik torrallappaat, holdit akimorlugit kajumissutsimik suliaqarlutik ikioqatigiinnerminni.
Unamminerit siulliit ingerlanneqarnerattut angutinut arnanullu bronzennanniunneq pissartanngorniunnerlu Nuummi Inussivimmi pissapput.
Unamminissat ima isikkoqarput:
Nal. 12.00 arnat bronzennanniutissapput: Akuleriit - K-1933
Nal. 13.45 angutit bronzennanniutissapput: N-48 og K-1933
Nal. 15.30 arnat pissartanngorniutissapput: GSS - NUK
Nal. 17.15 angutit pissartanngorniutissapput: NUK - GSS