GM politikkikkut eqqissisimanngitsumik pisoqarneranut oqaaseqarusunngitsoq

Greenland Mineralsimi pisortaaneq John Mair, novembarip qaammataani Siumukkormiut nutaamik siulittaasortaarnerisa ataasinngormallu Demokraatit naalakkersuisooqataajunnaarnerisa kingunerannik politikkikkut patajaanngitsumik inissisimasoqarnera pillugu oqaaseqarusunngilaq.

- Politikkikkut manna oqallittoqarernanut isummersimanngilagut, John Mair oqarpoq.

Sapaatip akunnerini kingullerni Greenland Mineralsip Kuannersuarni aatsitassanik qaqutigoortunik uranitaqalaartunik piiaaniarnera pillugu oqallittoqangaatsiarpoq.

- Greenland Minerals aktiaatileqatigiiffiuvoq, 2007-imili aatsitassanut inatsit naapertorlugu misissuinissamut akuersissutip killisarititaasa iluini aatsitassanik qaqutigoortunik piiaasoqarsinnaaneranik misissuisimasoq, John Mair Sermitsiaq.AG-mut oqarpoq.

- Suliniummi VVM-imut VSB-mullu tunngatillugit nalunaarusiat tamanut tusarniaassutigineqarnerannut atatigllugit ataatsimiisitsinernut maannakkorpiaq peqataavugut, soqutignnittunillu tamanik aammasumik oqaloqateqarnerput nuannaarutigaarput, taanna oqarpoq.

Ingerlatat ingerlatiinnarneqassasut

Nunami politikkikkut maannakkorpiaq inissisimasoqarneranut ingerlatseqatigiiffik qamoq isumaqarnersoq pillugu aperisoqarmat taamatut akissuteqarpoq.

Isumasiuinerit kingulliit malillugit illuatungiliuttut partiiat IA qinersisoqassappat nunami partiinit annersaalissangatinneqarpoq, tamannali pissappat Naalakkersuisut partiimit uranimut naaggaarluinnartumit, aamma Kuannersuarni aatsitassarsiorniarnermut akerliulluinnartumit taarserneqassapput.

Greenland Mineralsimilli tamanna oqaaseqarfigineqarusunngilaq.

Aatsitassanut Naalakkersuisoqarfimmi pisortap Jørgen T. Hammeken Holmip erseqqissaatigaa, tusarniaatitsinissaq inatsisitigut aalajangersagaasoq, maannalu politikkikkut qanorluunniit inissisimasoqaraluarpat tusarniaaneq pilersaarutaasutut ingerlatiinnarneqarniartoq.