Arsaannermi GM
GM: Pissartaasut pissartanngorniutivinnissamut anngupput
B-67 aamma G-44 pissartanngorniunnissamut anngunniunnerat unamminerat naligiiffiusorujussuuvoq. Nuummiut ajugaasuupput, taamaasilluni illoqarfeqatitik pissartanngorniunnermi unammisussanngorpaat
Nuummeersut IT-79 arsaannermi pissartanngorniunnermi pissartanngorniutivinnissamut anngunnerat Sermitsiaq.AG-mit allaaserineqareerpoq.
Pissartanngorniutivinnissamut anngunniuttut tullii tassaapput Nuummit B-67 aamma Qeqertarsuarmit G-44. Tassani Nuummiut 1-0-mik ajugaapput.
Taamaasilluni timersoqatigiiffiit Nuummiuinnaat pissartanngorniutivittussanngorput.
Unammineq naligiiffiusoq
B-67-ip G-44-llu unamminerat naligiiffiusorujussuuvoq. Immikkoortumi siullermi unammisut imminnut ataqqisorujussuupput.
Immikkoortumi siullermi isertitsisoqanngilaq.
Pissartaasut isertitsisut
B-67 siullermeerluni isertitsingajalluinnarpoq unammisut 52 minutsini unammereerneranni. Kisianni målit sannerutai Norsaq Lund Mathæussenip eqquinnarpai.
B-67-mi Malik Juhl aamma isertitsinissamut periarfissaqaraluarpoq, uniorlunili.
Unammisut 80 minutsi unammereersut B-67-mi siukkaasoq Norsaq Lund Mathæussen isertitsivoq.
Nuummiut isertitseqqinnissamut periarfissaqaraluartut unamminermi isertitsisoqaqqinngilaq.
Pissartanngorniutivinnermi IT-79 aamma B-67 taamaasillutik unammisussanngorput, Qeqertarsuup Tunuamiut Kugsak-45 aamma G-44 bronzinnanniuttussanngorlutik aqagu arfininngornermi.