GM peqataanianngitsoq: Sulisut isumannaassusaannut aarleqquteqartoq
Greenland Minerals Kuannersuarni suliassaq pillugu tusarniaalluniataatsimiititsinissanut peqataanianngitsoq, Naalakkersuisut ilisimatitsipput.
Ingerlatseqatigiiffimmit peqataasoqarniannginneranut ilaatigut tunngavilersuutigineqarpoq, siullermeertumik tusarniaasoqarnerani innuttaasunit qunusaarisumik pissusilersortoqarneranut assersuutissaqartoq, aammalu tusarniaaneq pisussaq sioqqullugu ”ersarissumik politikkimut sangutitsisoqarsimasoq”, isumartik malillugu ingerlatseqatigiiffiup sulisumik aallartitassamillu isumannaassusaannik
qulakkeerisinnaannginneranik pilersitsisumik.
Ineqarnermut, Attaveqaasersuutinut, Aatsitassanut, Inatsisit Atuutsitsinneqarnerannut Naligiisitaanermullu Naalakkersuisoq Naaja Nathanielsen (IA) tusagassiorfinnut nalunaaruteqarluni allappoq.
Tusarniaalluni ataatsimiititsinerit ilaatigut suliap ingerlanerata ingerlaqqinnissaanut aammalu VVM-imik aamma VSB-imik taagorneqartunut, suliassap avatangiisinut
inuiaqatigiinnilu piujuartitsinissamut sunniutissaannik nalilersuiffiusunut tunngassuteqartussaapput.
Ataatsimiitsitsinerit aggustip 23-aniit 28-anut ingerlanneqartussaaput, Greenland Mineralsimilli aallartitanik peqataasoqassanngilaq.
- Peqataaniarani nalunaarneq tunngavissaqarpallaanngitsoq
Naaja Nathanielsenip ilsimatitsissutigaa, ingerlatseqatigiiffik ataatsimiinnernut videolink aqqutigalugu peqataanissaanut neqeroorfigineqarsimasoq, tamannali itigartinneqarsimavoq. Peqataaniaratik nalunaarnerat taassuma uggorinerarpaa:
- Isumaqarpunga peqataasinnaanani nalunaarneq tunngavissaqarpallaanngitsumik pisoq.Neriuutigaara ingerlatseqatigiiffiup isummani allanngortissagaa aammalu minnerpaamik videolink aqqutigalugu peqataassasoq, tassami taassuma nammineq suliassaa qulequtarineqarpoq.
- Peqataasut isumannaatsuunissaat Greenland Minerals A/S-ip pingaartimmagu soorunami paasisinnaasorujussuuara. Ataatsimiititsinerit kikkut tamarmik isummernissaannut
apeqquteqarnissaannullu periarfissaqartitsisumik, eqqissisimasumik
pilersitsiviulluartumillu ingerlanneqassasut naatsorsuutigilluinnarpara. Tamannami tusarniaalluni ataatsimiititsinernut siunertarpiaavoq. Aammalu erseqqissassavara, ataatsimiititsinerit pillugit isumannaallisaanermut aarlerisaarisoqarneranik Naalakkersuisut
ilisimasaqanngimmata, Naaja Nathanielsen nalunaaruteqarnermi oqarpoq.
Taassuma ilanngullugu ilisimatitsissutigaa, Greenland Minerals peqataanissaa inatsisitigut piumasaqaataanngitsoq.
Naalakkersuisut IA-mit aqunneqartut inatsisissatut siunnersuummik, uranimik piiaasoqanngilluinnartoqarnissaanik atuutsitseqqilertussamik tusarniaassuteqarsimapput. Inatsisissatut siunnersuut akuerineqassappat, Kuannersuarni suliniut uranimik sanitigut qalluiffiusussaq unitsinneqartussaavoq.