Isikkamik arsaalluni GM

GM-imi Nuummiut pissartanngorniutivissapput

Angutit isikkamik arsaallutik pissartanngorniunneranni semifinalit sisamanngormat ingerlanneqarput. Unammisartut Nuumminngaanneersut B-67 aamma IT-79 pissartanngorniutivinnissamut piareerput. Qeqertarsuulli Tunuaninngaanneersut G-44 aamma Nagdlunguak bronzennanniussapput.

B-67 GM-imi pissartanngorniutivinnermut piareeqqippoq. Pissartanngorniutivinnermi taakku illoqarfimmioqatitik IT-79 unammissavaat

GM-imi pokali illoqarfiit pingaarnersaaniiginnassaaq.

Tamanna sisamanngornermi angutit isikkamik arsaallutik Qeqerartarsuarmi pissartanngorniullutik semifinalerneranni paasinarsivoq.

Semifinalimi siullermi hjemmebanertut G-44 ukioq kingulleq pissartaasut B-67 Nuumminngaanneersoq unammivaat.

Unamminermi B-67 2-1-mik ajugaavoq. Ari Hermann aamma Niels Svane unamminermi B-67-mut isertitsisuupput, Zakorat Zeebillu hjemmebanertut ataaseraartillugit.

Comebackerluarneq

Semifinalip aappaani unammipput IT-79 Nuumminngaanniik aamma Nagdlunguak Ilulissaninngaanniik. Unamminerlu pissaganartorsiorlualaavippoq.

Unamminerup immikkoortuata aappa ingerlasimatsialaartoq Nagdlunguak 3-1mik siuaqqavoq, unammisartulli Nuumminngaanneersut unamminermi comebackerluarpoq unammisulli 3-3mik naligiisilerlugit.

Unammineq naammassimmat ajugaasoqaranilu unammineq sivitsortariaqarsimavoq. Unamminerulli sivitsorneqaranerani unammisartut Nuumminngaanneersut nukittunerullutik unammineq 4-3mik ajugaaffigaat.

Taamaasilluni pissartanngorniutivinnermi Nuummiut unammisussanngorput. G-44 aamma Nagdlunguak bronzennanniutissapput.

Aqagu arfininngornermi pissartanngorniutivittoqassaaq.

Arfininngornermi unammisussat:

Bronzennanniunneq:

Nal. 13.00: G-44 - Nagdlunguak

Pissartanngorniutivinneq:

Nal. 15.00: B-67 - IT-79

Powered by Labrador CMS