GM-i unitsiinnarneqareersoq: Arsaattartut piumassuseerussinnaapput

Ilulissani sapaatip akunnerani 32-mi arsaalluni Nunatsinni pissartanngorniunnerit KAK-mit unitsiinnarneqarnerat timersoqatigiiffinnit tupaallannanngitsumik pakatsissutigineqarpoq.

Nagdlunguak' GM-imut aaqqissuisuusussaagaluarpoq, taamaattumik kattuffiup unititsiinnarniarluni aalajangernera timersoqatigiiffimmit paasiuminaatsinneqarpoq. Timersoqatigiiffik GM-imut aaqqissuisussatut toqqarneqarami ullormi tassani ilisimatinneqarpoq GM taamaatiinnarneqartoq.

Tunngavilersuut paasiuminaatsinneqarpoq

- Aalajangernermut pakatseqaagut akueriuminaatsillugulu sooq taamatut aalajangertoqarnersoq. Sooruna peqqinnartumik suliaqarluta aaqqissuussiniartugut illuata tungaani imerniartarfimmiittoqarsinnaava?, Nagdlunguami siulittaasoq Lena Ravn Davidsen oqarpoq.

- Unititsiinnarnermut tunngavik paasiuminaatseqaarput, timersoqatigiiffiimmi tusarniarneqanngillat, tassami killilersuutit unioqqutinnagit qanoq pissartanngorniuttoqarsinnaanera misissorneqarsinnaagaluarpoq. Immikkoortut agguarneqarsinnaagaluarput mikininngorlugit killilersuutit qaangernagit, periarfissat arlaqaraluaqaat.

Erseqqissaasoqartariaqartoq

Naalakkersuisut aalajangiinermut peqataatinneqarsimanersut Nagdlunguami siulittaasup paaserusuppaa.

- Sooq unititsiinnartoqarnissaanik aalajangertoqarsimanersoq KAK erseqqissumik nalunaaruteqartariaqarpoq. Imatut qisuariaateqarpugut unammisartugut illersorniarlugit, tassami unammisartut unamminissanut piumassusaat annaarusunngilarput. Unititsineq akuerinagu KAK-mut aallagaqareerpugut, siulersuisut qisuariaataat maanna utaqqivarput, Lena Ravn Davidsen oqarpoq.

Eqaluk 54 Tasiusamit Erik Røde Frederiksen unititsinermut allaanerusumik isummerpoq.

- Mianersortoqarnissaa pillugu unititsisoqarnera apeqquserpallaanngilara, unali erseqqissaatigissavara unammisaqattaarnissanut unititsisoqarneranut akerliuvunga. Kisianni anngunniukkiartussagutta timersoqatigiiffippassuit peqataasussaapput, arsaattartullu imminnut ilassiortarput. Arsaattartut nakkutigineqarnavianngillat ilassiornerminni, tamannami nammineq akisussaaffigissavaat, taamaattumik aalajangerneq akueraara, oqarpoq.

Coronavirusimik tunillaassuuttoqaqqilissagaluarpat timersoqatigiiffiit aamma KAK innuttaasunit isornartorsiorneqarujussuassasoq Erik Røde Frederiksenip takorloorsinnaavaa.

- Aamma imerniartarfiit kiisalu timersornermik unammiuaarnerit sanilliunneqaqattaarnerat paasisinnaanngilara, tassami maanna piffissamiippugut allami, mianersortariaqarpugut. KAK mianersorluni ima aalajangerpoq, tamanna ataqqineqartariaqartoq isumaqarpunga, neriuppunga pitsaanerpaaq aalajangerneqarumaartoq, Erik Røde Frederiksen oqarpoq.

Arsaattartut eqqorneqartut

B-67-imi sungiusaasumut ikiortip Jimmi Holm Jensenip aalajangerneq ugguarnartoqartippaa.

- Taamaattoq KAK uani aalajangernermi pisuutinneqarsinnaanngilaq, Namminersorlutimmi Oqartussat maleruagassanik sananikuupput, taakkulu malinneqartariaqarput. B-67-mi kinguaariit nikikkiartorput, inuusuttorpassuarnik arsaattartoqarpugut, aappaagulu Island Gamesimut peqataasoqartussaavoq. GM-it saqqumilaarnissamut periarfissatsialaasarput arsaattunut, taamaattumik uggornarpoq soorunami taamaatitsiinnarneq uggornarpoq. Unammisartut aamma aalajangerneq pakatsissutigisorujussuuaat, piumassusaannillu eqquisinnaalluni. Taamaattoq qujanartumik illoqarfimmi pissartanngorniutitsisoqartussaavoq, taanna oqarpoq, naqissuserluguli illoqarfimmi pissartanngorniunnerit aamma GM-it assigiinngitsorujussuusut.

Qeqertarsuarmit G-44 regionsmesterskabeqartitsisussaagaluarput, GM-imut anngunniutitsisussaagaluarput, juulip aallartinnerani.

- Tassunga aaqqissuinissamut piareersimalluinnaraluarpugut, taamaattumik pakatsinarpoq unititsiinnarnissamik aalajangerneq. Nunami angallannerup ammaqqinneqarnera unammisartunut eqquivoq, tamanna manaatsoornartuuvoq. Isumasiorneqarnikuunngilagut, unammersuaarnerup unitsiinnarneqarnera taamaallaat uagutsinnut paasissutissiissutigineqarpoq, G-44-mi siulittaasoq Jens Mølgaard oqarpoq.