GM Futsal: B-67 Nagdlunnguarlu kuultinnanniuttussanngorput
Nuummiut B-67 Iluliarmiunut Nagdlunnguamut angutit utoqqasaat futsalimi pissartanngorniunneranni ualimut pissartanngorniutivittoqalerpat unammersuartussanngorput.
Pissartanngorniutivinnissamut anngunniunneq aallartimmat angutit utoqqasaat U18-t unammisarnerattulli ilungersortigaat. Tassa B-67 Nuummeersoq aamma K-1933 Qaqortumeersoq ullumi nalunaaqutaq 13.00 unammillutik aallartimmata.
Unamminerup avinnera siulleq naammassilluinnalersoq B-67 isertitsivoq, 1-0-imillu siuarluni. Unamminermi unikkallartoqareerneranit unamminerup avinnerata aappaata aallartinneranit minutsit arfinillit qaangiutiinnartut B-67 aappassaat isertitsivoq, minutsillu qulingiluassaanni pingajussaanik aamma isertitsilluni.
Anngunniunnerup siulliu p naammassinissaanut minutsit marluk kingulliit atorlugit B-67 marloraaqqilluni isertitsivoq, unamminerlu taamaasilluni 5-0-imik inerneqarluni.
Anngunniunneq pissanganarluinnartoq
Anngunniunnerup aappaani NÛK Iluliarmiunut Nagdlunnguamut unammigami periataarnerulluni unamminerup aallartinneranit 50 sekundit ingerlareersullu isertitseriaqqaartuuvoq. Periarfissarli asiutinneqarpoq Nagdlunnguup målini paarilluarmagit.
Unammisut tamarmik arlalialunnik isertitseriartareersullu unamminerup affaa siulleq isertitsisoqanngitsorlu naavoq, unammisullu unikkallarlutik.
Nagdlunnguaq aalajangiisumik isertitsivoq
Nagdlunnguarli unamminerup avinnerata aappassaani periataarneruvoq. Taamaasillunilu minutsini pingasuni unammereerlutik isertitsilluni, isertitat 0-1-imik allaqqalersillugit.
Isertitsisoqareersorlu unammisut sukkatsilluinnarput. NÛK arlaleriarluni periarfissaqartaraluarpoq, aatsaalli unammineq naallugu siggartoqarsimatsiaannartoq isertitsilluni. Isertitsineq Nuummiunut neriulersitsigaluarpoq. Dommerilli nalilersuereerlutik aalajangerpaat isertitsineq kingusinaartoq, taamaattumillu unamminermi atuutinngitsoq. Taamaasilluni Iluliarmiut pissanganarluinnartumik unammisoqareersorlu pissartanngorniutivinnissamut anngupput.
Bronzennanniunneq ullumi nalunaaqutaq 16.45 aallartissaaq, tassani K-1933 Qaqortumeersoq NÛK-mut unammissalluni.
Pissartanngorniutivinneq nalunaaqutaq 17.30 Godthåbshallenimi aallartissaaq.