Gletchermelip Afrikami nunaateqarneq pitsaanerulersikkaa

Gletsjermelinik taaguutillit Kalaallit Nunaanni sermip aanneranit imermit aniatinneqartartut Afrikami Danmarkimilu nunalerinermit pissarsiarineqartut pitsaanerulersissinnaavaat.

Ilisimartusarfik Ilisimartusarfik Ilisimartusarfik Ilisimartusarfik

Kalaallit gletchermeliisa silap allanngoriartornerata ajornartoortitsinerani uumassusillit assigiinngissitaarnerannik unammilligassat ilaat iluarsiiffigisinnaavaat.

Ilisimatusarnikkummi misissuinerit nutaat takutippaat gletchermelit naatitanut pitsaasumik sunniuteqartartut.

Professor Minik Rosing suliniummik ingerlatsisuuvoq, tassani Novo Nordisk Fonden suleqatigalugu ukiuni pingasuni kingullerni gletchermelit piginnaasaat misissorpaat misiliummillu naatitsilluni.

- Gletschermelinik naggorissaaserluta Danmarkimi kiisalu Afrikami Ghanami misileraanitsinni pissarsiassat annertunerunerat tupaallaatigivarput. Maannami Ghanami ilaatigut majsinik naatitsiviusumi allaat ukiut pingajussaanni iluaqutaanera annertunerujartortoq paasivarput. Tassa imaappoq una isumassarsiatut aallartittoq piviusunngortoq: Gletschermeli iluaqutaavoq, professori oqarpoq.

Naatitat pitsaanerulersittarai

Gletchermelit nunamut naatitsiviusumut naggorissaatitut atorlugit naatitanik pissarsineq annertuumik pitsanngortinneqarsinnaasoq, sunniutaalu naatitsinerni arlalinni sunniuteqartartoq, misiliinerit takutippaat.

Taamaalilluni nunatsinnit gletchermelit siunissami nunarsuarmi nerisassaqarniarnissamut pitsanngortitsisinnaassuseqarput. Tassami “kuultit qaqortut” nassaassaasut amerlapput.

Atortussiat taakku Nuup Kangerluani tatsimi ataatsimi amerlangaarmata, gletchermelip nunarsuarmi Afrikami Saharap kujataani nerisassiat nalingi naatsiivinni tamani pitsanngortissinnaavai, ilisimatuut ilisimatitsipput.

Suliniut pillugu Nuummi oqaluttuarniartut

Minik Rosingip gletchermelinik ilisimatusarnermit inernerit inuiaqatigiit kalaallit sapinngisamik tamakkiisumik iluaqutigissagaat kissaatigaa – siullermillu – sulinermit inernerit kalaallinut attuumassuteqartunut pissarsiassaanissaat pingaartippaa.

Taamaammallu suliniut pillugu Ilisimatusarfik Nuummi Katuami pingasunngorpat 8. september 16.30-1800 oqallitsitsiniarluni aalajangerpoq, tassani Ineqarnermut, Attaveqarnermut, Aatsitassanut Naligiissitaanermullu naalakkersuisoq Naaja Nathanielsenip Minik Rosingip saqqummiinera saqqummiutissavaa, tassani Nunalerinermut, Imminut Pilersornermut, Nukissiutinut Avatangiisinullu naalakkersuisoq Kalistat Lund Kalaallit Nunaanni nunalerinerup imminullu pilersornerup ineriartornera pillugu eqqarsaatinik sammivinnillu ilanngussiniarpoq.

Sisamanngornermi qulingiluaanni suliniut pillugu Ilisimatusarfik kalaallinut suliaqarsinnaasunut workshopeqartitsiniarpoq.

Powered by Labrador CMS