GIF: Ujamit amerlanerusut angerlaateriassavagut
Arctic Winter Gamesertoqarnissaanut peqataasussarpassuit Albertamut aallarnissamut piareerluinnalerput. Anguniagaq tassaavoq soorunami kingullermit angusat pitsaanerunissaat, GIF-imi generalsekretær oqarpoq.
Nunatsinni timersoqatigiiffiit kattuffiat, GIF-ip Canadami, Albertami Arctic Winter Gamesimut angalasussat 89-it angalanissaat piareersarsimavaat. Arctic Winter Games 2023 29. januarimiit februarip sisamaat ilanngullugu ingerlanneqassaaq.
Anguniagarineqarpoq nunarput kingullermik Arctic Winter Gamesertoqarnerani 2018-imiit pitsaanerusumik angusaqassasoq.
- Soorunami anguniagarissuarput timersornermi angusat kingullermernit pitsaanerunissaat. Medaljet angerlaanneqartut minnerpaamik kingullermitut amerlatigissapput, imaluunniit amerlanerussallutik, GIF-imi generalsekretær Jonas Jensen Sermitsiaq.AG-mut oqarpoq.
Nunarput 2018-imi AWG-rtoqarmat 65-inik medaljennappoq. Kuultit 18-it, sølvit 25-it bronzellu 22-it. Coronavirusip tunillaassuunnera pissutigalugu ukiuni sisamani Arctic Winter Gamesertoqarsimanngilaq.
Piginnaanillit anguniagaqarusuttut
Nunatsinnit angalasussani 67-it timersortartuupput. Timersuutit sulorarneq, nerrivimmi arsaararneq, Denegames, Arctic Games, snowboard aamma volleyball peqataaffigineqassallutik.
Piffissami sivisungaatsiartumi unammiuaaqatigiittoqarsimanngimmat timersornermi qaffasissuseq maanna nalileruminaappoq.
- Timersornermi qaffasissuseq maanna nalileruminaappoq, allanut sanilliulluta. Inuusuttulli timersuutini piginnaasaqartut ineriartornissamut periarfissagissaarluartut anguniagaqartullu unammialerput. Soorunami isumalluarpugut angusarissaarnissamut, aamma peqataasussat sapinngillat, Jonas Jensen oqarpoq.
Unammiartussat angalaqataasussallu Albertamut tallimanngorpat aallassapput. Nunatsinniit Kangerlussuarmiit timmisartumik attartukkamik toqqaannartumik angalasoqassaaq. Angallannerullu tallimanngorpat tungaanut qanoq innissaa GIF-ip malinnaaffigaa, ullumi pingasunngornermi silapiluttussaanera ilimasaarutigineqarsimammat. Timersortartut saniatigut ilaqutaasut timmisartumut attartoqarneqarsimasumut akiliillutik ilaanissamut periarfissinneqarsimapput.
Nunarput, Alaska, Alberta North, Northwest Territories, Nunavik, Nunavut, Sápmi aamma Yukon AWG 2023-mi peqataassapput.
GIF ilisimatitsivoq angusat kattuffimmit Facebookikkut nalunaarutigisarumaaraat. Pisut malinnaaffiginiarukkit AWG 2023-p nittartagaa aamma iserfigisinnaavat.