GIF: Timersornermik aaqqissuussinerit qaammatip sinnerani atorunnaarallartinneqarlik

Kalaallit Nunaanni Timersoqatigiit Kattufianit innersuussutingaarput illup iluani silamilu timersorneq aqqutigalugu Kalaallit Nunaanni aaqqissuussat tamarmik 31. marts 2020 tungaanut atorunnaarallartinneqassasut.

Kalaallit Nunaanni Nappaalanersuaqartillugu Ataatsimiisitaliamit COVID-19 tuniluunnissaanut akiuiniarnermut innersuussutit maleruaqquneqartut aallaavigalugit Kalaallit Nunaanni Timersoqatigiit Kattuffianit aaliangerpugut kaammattuutitut innersuussutigissallugu timersorneq aqqutigalugu aaqqissuussat tamarmik 31. marts 2020 tungaanut atorunnaarallartinneqassasut, atorunnaarallartitsinermullu piffissaliunneqartoq pisut aallaavigalugit sivitsorneqarsinnaanera eqqumaffigeqquarput.

- Kalaallit Nunaanni Timersoqatigiit Kattuffianit, oqartussanit innersuussutit, piumasaqaatit maleruaqqusallu tapersersorluinnarpagut. Timersoqatigiit Kattuffiinut timersoqatigiit peqatigiiffiinullu, Kalaallit Nunaanni Timersoqatigiit Kattuffianit nalunaarutigissuarput timersorneq aqqutigalugu najungaqarfigisami, nunap immikkoortuini nunalu tamakkerlugu aaqqissuussani sapaatip akunnerini marlunni atorunnaarallartitsinissaq, Kalaallit Nunaanni Timersoqatigiit Kattuffiani siulittaasoq, Nuka Kleemann, oqarpoq.

Qularutiginngilarput pilersaarutaareersunut ullumikkut ingerlanneqartunut kalluaajumaartoq, taamatulli innersuussuteqarnerput paasineqassaaq Kalaallit Nunaanni timersornermi aaqqissuussat nualluutip coronavirus tuniluunnginnissaanut akiuiniarnermi suleqataanerput pingaartikkatsigu. Taamaattumik Kalaallit Nunaanni Timersoqatigiit Kattuffianit innersuussutigissuarput kajumissutsimik suliaqarluni timersoqatigiit peqatigiiffii illup iluani silamilu piffissami taaneqartumi pisussat unitsinneqarallassasut. Piffissamilu tassani innersuussutigissuarput timersoqatigiit kattuffii tamarmik nualluutip coronavirus-ip tuniluutinnginnissaanut suliniutinik aallartitsissasut.

- Timersornermi aaqqissuussat inuppassuarnik; timersortartunik isiginnaartunillu ataatsimoortitsilluni katersuuffiusarput. Taamatullu ataatsimoortitsineq coronavirus-imut tunillatsinnissamut tunillaassuinissamullu kinguneqarnissaa qanittuararsuanngorsinnaavoq, Nuka Kleemann oqarpoq.

Kalaallit Nunaanni Timersoqatigiit Kattuffianit ilisimaarivarput timersoqatigiit kattuffiinut peqatigiiffinnullu taamatut innersuussineq kinguneqarsinnaasoq.

- Piffissami matumani pisoq siornatigut aqqusaarsimangilarput, taamaattumik timersoqatigiit kattuffii peqatigiiffiilu suleqatigalugit pisup kingunerisinnaasai qulaajaanikkut iliuuseqarfigissuagut, taamatullu iliuuseqarnissami oqartussat, soqutigisaqatigiit suleqatigisagullu ataatsimoorluta iliuusissamik nassaarniartariaqarpugut, Nuka Kleemann oqarpoq.

Powered by Labrador CMS