GIF UNICEF-ilu aningaasaateqarfimmit tapiiffigineqarujussuartut
Nordea-fonden timimik aalatitsinerulernissamik suliniummut syv millioner koruuningajalluinnarnik tapiissuteqarpoq.
Kalaallit Nunanni Timersoqatigiit Kattuffiat UNICEF-ilu timimik aalatitsinerulernissaq anguniarlugu suliniummut Ataatsimoorluta Aalasa-mut aningaasarpassuarnik aningaasaliiffigineqarput.
Suliniut Paarisa, KNI aamma Kalaallit Nunaanni Innuttaasut peqqinnissaannut ingerlatsivik suleqatigiillutik aallartisartussaavaat, maannalu suliniut Nordea-fondenimit 6.985.500 koruuninik tapiiffigineqarpoq. Suleqatigiit tusagassiorfitsigut nalunaaruteqarlutik taamatut ilisimatitsipput.
Suliniut meeqqat inuusuttullu pitsaanerpaamik peqqinnartumik atugassaqartitaanissaat anguniarlugu, meeqqat pisinnaatitaaffii, aallutassanut peqatigiiffinnilu timersortarnermut akuliutitsilluni ingerlanneqartussatut siunertarineqarpoq. Qeqqata Kommuniani suliaq misiliutitut ingerlareerpoq, Ataatsimoorluta Aalasa-mi suliniutit tamarmik nunatta sinneranut siaruaanneqartigatik tassani misiligarneqarlutillu tulluarsaaffigineqarput.
Ataatsimoorluta Aalasa – peqatigiilluni aalaneq pillugu
UNICEF Danmarkip Kalalalit Nunaanni allaffiata, Timersoqatigiit Kattuffiata, Paarisa peqatigalugu, KNI A/S-imiillu, Politiinik, aammalu Kalaallit Nunaanni Innuttaasut Peqqissusiannik ingerlatsivik tapersersortigalugit suliaq ukiuni sisamani suleqatigiiffittut ingerlanneqarpoq. Suliniutip aallartinneqarnera avammut suaarutigineqarpoq Katuami 24. novembar 2021-imi.
Timersornerup silarsuaani meeqqat toqqissisimasumik peqqinnartumillu atugaqarnissaat, meeqqallu pisinnaatigaaffiisa tunngavigineqarnissaat pingaarnertut anguniagaavoq. Taassuma saniatigut suliniuteqarnikkut siunissami meeqqat suli amerlanerusut timiminnik atuillutik timersortalernissaat anguniarneqarpoq – taamaasillunilu meeqqat timikkut eqqarsartaatsikkullu peqqinnartumik ineriartorsinnaanissaat aqqutissiorneqartussaalluni.
Suliniut aningaasaateqarfimmit Nordea-fonden’imit, KNI-mit, IKIIN-imit aammalu aningaasaateqarfimmit Sportsgoodsfonden’imit aningaasaliiffigineqarpoq
Pissarsiffiit Unicef GIF-ilu
Suliniut Paarisap, KNI-p aamma Kalaallit Nunaanni Innuttaasut peqqinnissaannut ingerlatsiviup suleqatigiillutik aallartisartussaavaat, suliniutigineqartorlu Nordea-fondenimit maanna tapiiffigineqarluni.
Suliniutinut pisortaq nuannaartoq
UNICEF Kalaallit Nunaanni suliniutinut pisortap Maliina Abelsenip annertuumik tunissuteqartoqarnera nuannaarutigaa:
- Peqataatitsisumik toqqissisimanartumillu sungiusaasunik, kajumissutsiminnik ikiuuttartunik, sulisunullu meeqqat pisinnaatitaaffiinik ilisimasaqarluartunik peqarnissatta aqqutissarsiorneqarnissaa angusinnaalissavarput, timersornerullu silarsuaata avatangiiserissaartuulernissaanik suliniuteqarnerput Aningaasaateqarfiup Nordea-fonden’ip aningaasaliinermigut taperamiuk, Maliina Abelsen oqarpoq.
Nordea-fondenimit naatsorsuutigineqarpoq, suliniuteqarnikkut meeqqat inuusuttullu amerlanerit inuunertik ajunngitsumik atugaqarlutik aallartissinnaassagaat:
- Aningaasaateqarfiup Nordea-fonden’ip ukiumut 10 mio. kr. Kalaallit Nunaanni suliniutinut inuunerissaartitsisunut agguaattarpai, suliniullu una aqqutigalugu meeqqat inuusuttullu ingerlalluarnissaannut aqqutissiuunneqarnissaannullu atugassaagamik aningaasaliineq una assersuutitsialattut taaneqarsinnaaqaaq, Nordea-fonden’imi agguaassisarnermut pisortaq, Christine Paludan oqarpoq.