Skip to main content

GIF: Nick Nielsen nersualaagassaavoq

Ilinniartitaanermut, Ilageeqarnermut, Kulturimut Naligiissitaanermullu Naalakkersuisoq Nick Nielsen, Siumut, OL-eqarnerani najuummat timersoqatigiit kattuffiata nersualaarpaa

Ilaat isumaqartut ilinniartitaanermut, ilageeqarnermut, kulturimut naligiissitaanermullu Naalakkersuisoq Nick Nielsen ukiuunerani Sotji-mi OL-eqarnerani najuunnermigut timersorneq tapersersortariaqanngikkaluaraa, taava Kalaallit Nunaanni Timersoqatigiit Kattuffianni, GIF-imi, siulittaasup Nuka Kleemannip tamakkiisumik taperserpaa.
– Piffinni makkunani ataatsimooqatigiinneq nukittooq aqqutigalugu angusaqarnissaq naleqartitanillu peqqinnartunik pilersitsinissaq pingaaruteqaqimmat Ilinniatitaanermut, Ilageeqarnermut, Kulturimut Naligiissitaanermullu Naalakkersuisup Nick Nielsenip oqaloqatiginninnera tapersersuineralu Kalaallit Nunaanni Timersoqatigiit Kattuffiata iluarisimaartorujussuuvaa. OL-imut, Martin Møllerip Kalaallit Nunaannit kisiartaalluni peqataaffigisaanut, atatillugu pingaaruteqarpoq takutinniassallugu Kalaallit Nunaat piffissaq ungasinnerusoq isigalugu nammineq erfalasuni atorlugu OL-imut peqataasalerusuttoq, GIF-imit oqarput.
– Nammineq erfalasoq atorlugu peqataasalernissaq ungaseqaaq, saqqumilaarnikkulli oqaloqatigiinnikkullu takorluugaq tamanna malersorniarparput. Taamaattumik Kalaallit Nunaanni Timersoqatigiit Kattuffiata nuannaarutigisorujussuuvaa Ilinniartitaanermut, Ilageeqarnermut, Kulturimut Naligiissitaanermullu Naalakkersuisup Kalaallit Nunaat OL-imi peqataaqatigimmagu.
Nuka Kleemannip erseqqissarpaa Kalaallit Nunaat aamma OL-imi peqataammat, taamaattumillu pissusissamisoortoq avammut imminut nittarsaannissaq.
– Siusinnerusukkut takusareersimavarput aaqqissuussinerni taamaattuni soorlu Nagano-mi OL-eqarnerani il.il. peqataatitaqartartut. GIF-ip tapersersuinera OL-imilu, ukiut sisamakkaaginnarlugit pisartumi, peqataanera qujaruppaa, tamannalu Kalaallit Nunaanni timersornermut naleqarluassaaq. Timersortartut suli pitsaanerusunik atugassaqartinneqalernissaannut unammilligassarpassuaqarpoq, Kalaallit Nunaannilu Timersoqatigiit Kattuffiata Nick Nielsen oqaloqatigilereerpaa, sinertaralugu timersornerup pitsaasumik ineriartornissaa aqqutissiuunniarlugu ilinniartitaanermut, ilageeqarnermut, kulturimut naligiissitaanermullu Naalakkersuisup periusissaanut timersoqatigiit kattuffiat ilassuteqassasoq, Nuka Kleemann oqarpoq.
Ilanngullugu oqaatigaa suut tamaasa ataqatigiissinniarlugit sungiusaasut, pisortat, ikiortillu akunnerpassuarnik atuisarnerat amerlanerpaat ilisimagaat.
– Ilaatigut ingerlanneqassapput atortut, timersortarfimmi piffissat atugassatut tunniunneqartut, timersortartut, siulersuisuni ataatsimiinnerit, paasissutissiinerit, kajumissutsiminnik sulisut amerlanerusut. Angalanerit, unammiuaarnerillu isumaginissaat sponsorillu. Timersornermi isumagisassarpassuaqarpoq, ulluinnarnilu ingerlatsinerujussuarmi piumassutsiminnik meeqqanik inuusuttunillu sullissisorpassuaqarfiusumi pitsaasuuvoq naalakkersuisoq piumassutsimik pitsaasumik taama annertutigisumik takutitsimmat. Piffissamut sivisuumut suliniut aallartissimavarput piumassutsiminnik sulisut tamakkorpiaat nukittorsarniarlugit, neriuppugullu oqaloqatigiilluarnitta nanginneratigut timersorneq ineriartortissinnaallutigu, Nuka Kleemann oqarpoq, angalanermili tamatumani nammineq peqataasinnaasimanngilaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER