GIF-mi siulittaasoq innersuusivoq: Misissortinnissamut periarfissat qulakkeerneqassapput

Timersuutini suniluunniit unammersuartoqassagaluarpat timersortartunut akiuussusersorneqanngitsunut covid-19-imut misissuisarfissat qulakkeerneqartariaqartut, Kalaallit Nunaanni Timersoqatigiiffiit Kattuffiat innersuusivoq.

- Akiuussusersorneqanngitsunut misissuisarfissat qulakkeerneqarnissaat innersuussutigaarput. Timersortartut unammersuarnissamut peqataarusuttut assersuutigisinnaavagut, GIF-mi siulittaasoq, Nuka Kleemann oqarpoq.

Naammassillutik akiuussusersorneqarnikut imaluunniit coronamik tunillatsissimannginnermut upernarsaat sivisunerpaamik akunnernik 48-inik pisoqaassuseqartoq atorlugit neriniartarfimmut, imerniartarfinnut allanulluunniit aaqqissuusanut, soorlu timersornermi aaqqissuusanut aatsaat peqataasoqarsinnaavoq. Taannalu augustip qulingata tungaanut atuuppoq. Illoqarfimmi nunaqarfimmiluunniit covid-19-imik tunillatsittoqarsimappat ulluni 30-ini aaqqissuinernik annertuunik aaqqissuisoqaqqusaanngilaq.

Maanna KAK isikkamik arsaanermi unammersuartitsinissamut immikkut akuersissummik qinnuteqarnermini Namminersorlutik Oqartussaniit tusagaqarnissaminut utaqqivoq.

Kalaallit Nunaanni Timersoqatigiiffiit Kattuffiat isumaqarpoq timersortartut tamarmik unamminerni peqataasinnaasariaqartut, akiuussusersorneqarsimagaanni kapitissimanngikkaaniluunniit. Taamaammat misissuisarfissat akiuussusersorneqanngitsunut naammattut pigineqarnissaat, kattuffiup kaammattuutigaa.

- Akiuussusersorneqanngitsunut misissuisarfissat qulakkeerneqarnissaat innersuussutigaarput. Timersortartut unammersuarnissamut peqataarusuttut assersuutigisinnaavagut, GIF-mi siulittaasoq, Nuka Kleemann oqarpoq.

Taassuma saniatigut oqartussat naliliisarnerat aalajangiisarnerallu tatigilluinnarlugit oqaatigaat.

- Timersortartut timersorsinnaanissaat eqqarsaatigalugu soorunami maleruaqqusanik atuutsitsisoqannginnissaa kissaatigigaluaqaarput. Kisianni nalunngilarput qanoq maanna inissisimasoqarnersoq, taamaammat pissutsinut tulluarsartariaqarpugut, Nuka Kleemann oqarpoq.

Powered by Labrador CMS