GIF-ip sulisuni amerlivai
Kalaallit Nunaanni Timersoqatigiit Kattuffiat siunissamut arlalinnik anguniagaqarpoq, taamaattumik suleqataasut amerlineqarput
Kalaallit Nunaata nunarsuarmi timimik aalatitsinerpaanngornissaq Kalaallit Nunaanni Timersoqatigiit Kattuffianni anguniarneqarpoq.
Kalaallit Nunaanni Timersoqatigiit Kattuffiata annertuumik anguniagaliussaminut iluminni iliuuseqarlutik malitseqartitsipput, sulisunik marlunnik atorfinititsilluni.
- Suleqatigiinnut ilaliutilerput, massakkut Timersoqatigiiffiit Assammik Arsartartut Kattuffiata siunnersortaa Poul Petersen kiisalu Silkeborg Kommuneani `Inuunerit pillugu aalagit`-mik taasamik immikkut suliniutitut ingerlassimasami saniatigut Outdoor´mi timersornermut siunnersortaasimasoq Bjørn Søvsø Jensen, tusagassiutinut nalunaarummi ilisimatitsissutigineqarpoq.
Piginnaassuseq misilittagaqassuserlu
Kalaallit Nunaanni Timersoqatigiit Kattuffiata nalunngilluarpaa, nunarsuaq tamakkerlugu aalanerpaanngorsimanissatsinnik anguniagaliussartik kisimiillutik angusinnaanagu, ataatsimoorlunili iluarsartuussamik ilungersuullugu suleqatigiinnikkut aatsaat anguneqarsinnaasoq, Kalaallit Nunaanni Timersoqatigiit Kattuffiata pisortaa Jonas Jensen oqarpoq.
- Qinnuteqartorpassuit akornanni taakku marluk atorfinitsinniarlutigit aaliangiussimavagut, piginnaassutsimikkut misilittakkamikkullu, ingammik massakkorpiaq killiffitsinnut, naleqqummata. Marluullutik timersornermut soqutigisaqarluartuusut saniatigut timersornerup silarsuaanut akuutitserusuttuullutillu timersornikkut killiffiit assigiinngitsut aallaavigalugit inerisaasarnertigut misilittagaqarluartuupput, oqarpoq.
47-nik ukiulik Poul Petersen Kalaallit Nunaanni Timersoqatigiit Kattuffianni martsip aallaqqaataani atorfinissaaq, 34-nik ukiulik Bjørn Søvsø Jensen atorfimmut maajip ulluisa aallaqqaataani atorfinissalluni.