Skip to main content

Ghita Nørby Nunatsinnut tikeraarngaassaaq

Katuami atuffassisoqarlunilu kalaallit erinniaannik klassiskinik tusarnaartitsisoqassaaq

Sisamanngormat juunip 19-ianni nalunaaqutaq 19.00 Nuummi kulturip illorsuani Katuami kalaallit erinniaannik klassiskinik tusarnaartitsisoqassaaq, Danmarkimi nipilersortartoq tusaamasaq Svenn Skipper siulersuisoralugu. Tusarnaartitsinermut atatillugu Ghita Nørby tusarnaartitsinerup immikkoortuani siullermi oqaluttualiamik atuffassissaaq.
Tusarnaartitsinerm immikkoortoq siulleq ´Musik og Eventyr´ isiginnaartitsinerussaaq, tassani Ghita Nørby oqaluttualiamik atuffassilluni pattattumit Svenn Skipper-imit qarlortartartumillu Arnanngua Gerstrøm-imit ingiorneqarluni. Musik og Eventyr isiginnaagassiaavoq Ghita Nørbyp Svenn Skipper-illu Danmarkimi ukiorpassuarni ingerlattarsimasaat, qarlortartartoq Michala Petri suleqatigalugu.
Tusarnaartitsinerup immikkoortuata aappaani Arnannguaq Gerstrøm-ip Erinniat Ensemble-mit erinniai akissarsiutigalugu nipilersortartut 15-it atussavaat. Nipilersortartut tamakkua nipilersortarfinnit pitsaanerpaaneersuupput, ilaatigut Islandimi Kammersveit Reykjavikur-imit, Københavnimi Den Kongelige Kapel-imit Tysklandimilu *Die Müncher Philharmoniker-imit. Qarlortartartoq nuannarineqartoq Verner Nicolet. cd-nik saqqummersitseqataasartoq ukiorpassuarnilu Rasmus Lyberthimik nipilersoqateqartartoq, Erinniat Ensemble-mi nipilersoqataassaaq.
Arnannguaq Gerstrømip erinniani ukiup ataatsip missaani sanasimavai. Nuna kulturilu isumassarsiorfigalugit. Erinniani arlalinni kalaallit Qilaataat ilaasarpoq, tumerparlaarlu angisooq ´sikup akisuaneratut´. Arnannguaq nunani avannarlerni eqqumiitsuliortut attaveqarfiannut Far North-imi ilaasortanngortinneqarsimavoq ilaatigut erinniani taakku pissutigalugit, eqqumiitsuliortullu attaveqarfiat tusarnaartitsinermi aamma peqataassaaq.
Arnannguaq Gerstrømip erinniani 2010-mi Nunatsinni siullerpaamik saqqummiuppai Københavns Blæserkvintet, ilaasortaaffigisani, nipilersortoralugit. Kingorna eqqumiitsuliortut nunat allamiut Arnannguup erinniai inniminnertarsimavaat siullermeersumillu saqqummiuttarlugit. Maanna Nunatsinni erinniaminik nutaarluinnarnik siullermeersumik saqqummiusseqqaaqqissaaq.
Taalliortoq Frederik Kristensen ´kunngi´, Kristian Olsen ´aaju´ aamma Mike F. Thomsen erinnianut taalliorsimapput, tamakkualu atorneqassapput opera-mik erinarsortartunit Sverige-meersunit erinarsoqatigiinnillu Qupannavaanit.
Assiliisup Helle Nørregaardip erinniamut Sermersuaq assitalersuissaaq, taannalu suilaanut anginerusumut, 2016-imi naammassineqartussamut, qilanaartuutaassaaq. Tamatumunnga atatillugu Helle Arnannguarlu unnuani sisamani Sermersuarmi unnuisimapput, Tunumi Isortumi piniartut qimussertartullu peqatigalugit. Sermersuaq angalanermit tassannga isumassarsiarineqarsimavoq.
Suliniut Erinniat ingerlanneqarpoq Kulfurfonden-imit kiisalu Tips og Lotto-mit namminersorlutillu oqartussanit tapiiffigineqarluni.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER