GFS: Ukiumi nutaami annertuumik amigartooruteqaqqinneq
Greenland Facility Services (GFS) ukiup aappassaa amingartooruteqarpoq. Tamanna ukiumut naatsorsuutini ileqquusumik ataatsimeersuarnermi akuerineqaqqammersumi allassimavoq.
2016-imi ukiumut angusat 8,245 millioner koruuniupput. 2017-imullu ukiumut naatsorsuutini 7,256 millioner koruuninik amingartoorutigineqarput.
“Naammaginanngitsoq”
Aqutsisut paasissutissiaraat, atuisunik misissuineq peqqutigalugu kaaviaartitat annikitsumik appariaateqarsimasut.
- Taakku pissutigalugit aningaasartuutinut ilanngunneqarsimanngillat, tamannalu ukiumut naatsorsuutinut naammaginanngitsumik angusaqartitsivoq, pisortaaneq Ole Bøgh Ulriksen aqutsisut oqaaseqaataanni erseqqissaavoq.
Naatsorsuutinut nalimmassaanermi eqqiaanermut isumannaallisaanermullu immikkoortoqarfiit “suliffeqarfiup aningaasaqarneranut iluaqutaasussamik” tuninissaat aalajangiunneqarsimasoq, ilanngullugu paasissutissiarineqarpoq.
Sulisut amerlanerit
Suliffeqarfimmi agguaqatigiisillugu aalajangersimasumik sulisut 164-iupput ukiup siuliani 149-iusimallutik, tamannalu sulisunut aningaasartuutinut 54,8 millioner koruuniniit 57,4 millioner koruuninut qaffariaateqarsimanerat takuneqarsinnaavoq.
Aamma allassimavoq, siulersuisut akissarsiaat 2016-imi 125.684 koruuniniit 2017-imi 200.000 koruuninut qaffariaateqarsimasut. Pisortallu Ole Bøgh Ulriksenip akissarsiai 70.000 koruuninik appariaateqarsimapput, tassa ukiumut akissarsiai 1,506 millioner koruuninngorlutik.
Aningaasaatit sunnerneqarnerat
Annertuumik amigartooruteqarneq aningaasaatinut sunniuteqangaatsiarpoq, 2016-imimi 12,181 millioner koruuniniit ukioq manna 4,926 millioner koruuniniut appariaateqarput.
GFS piginneqatigiiffiuvoq, Michael Munchimit Per Laugesenimillu pigineqartoq, taakku tamarmik Nuummi najugaqarput.