GFS-p eqqiaaneq, pigisanillu nalilinnik ajoqusersimasunik aaqqissuineq tuniniarpai

Greenland Facility Services A/S (GFS) ukiuni marlussungajanni pioreersimavoq, najukkamilu piginnittut ingerlatat ISS Grønlandimiit tiguneqarneraniit 2016-imi 8 million koruuninik annaasaqarsimavoq. Tuniniaanerlu ingerlatsiviup ingerlatsineranut aaqqiissutaassaaq.

Piginnittut isumaqatigiittut

Piginnitut aqutsisulli ingerlatsiviup avinneqarnissaa isumaqatigiissutigaat, taamaasilluni eqqiaaneq, pigisanillu nalilinnik ajoqusersimasunik aaqqissuineq Arctic Cleaning Services ApS-mik ateqalerluni ingerlatsivinngussaaq. Suliffeqarfiup avinneqarnera 1. martsimiit atuutilissaaq.

Ullormi tassani Nuummi eqqiaaneq, pigisanillu nalilinnik ajoqusersimasunik aaqqissuineq - sulisui suliaallu tamarmik - ingerlatsivittaamut Arctic Cleaning Services ApS-mut nuunneqassapput, tassani piginnittut taakku amerlanerussuteqarluarput, aammalu piginneqataallunilu pisortaaneq Thomas Bang ingerlatseqatigiiffittaami siuttuussaaq, tusagassiuutinut nalunaarummi allassimavoq.

- GFS-p sinerissami immikkoortoqarfii tunisinermit eqqorneqassanngillat. Tassa Nuummi qitiusumik allaffeqarfiup saniatigut GFS Qaqortumi, Paamiuni, Kangerlussuarmi, Sisimiuni, Ilulissani Aasiannilu immikkoortoqaaannassaaq. Immikkoortoqarfiilllu tamarmik massakkut suliatik – eqqiaaneq ilanngullugu – attatiinnassagaat aamma pilersaarutaavoq, pisortaaneq Ole Bøgh Ulriksen oqarpoq.

- Arctic Cleaning Services siuttuuffiginissaa sulisullu tatigineqartut suleqatigalugit ingerlatseqatigiiffiup pitsaasumik ingerlanissaata qulakkeernissaa qilanaarivara, Thomas Bang – ukiut tallimat sinnerlugit Greenland Facility Servicesimi atorfeqarsimasoq, piffissallu sivisunerpaartaani eqqiaanermi, pigisanillu nalilinnik ajoqusersimasunik aaqqissuinermi immikkoortoqarfimmiissimasoq – oqarpoq.

Qanimut suleqatigiinneq

Ingerlatseqatigiiffiit marluullutik qanimut suleqatigiissapput, taamaasillutik ingerlatseqatigiiffiit taakku marluullutik Eqqiaaneq, Pigisanik nalilinnik ajoqusersimasunik aaqqissuinermi, Isumannaallisaanermi & Nakkutilliisoqarnermi, Paarnaarsaatinik kiffartuussinermi, Nuunnermi, Qatserinermi & Annaassiniarnermi kiisalu Pigisanik nalilinnik aserfallatsaaliuinermik neqeroorutigeriikkatik siunissami attatiinnassavaat.

- Ingerlatseqatigiiffiit ingerlatanik sammisaqarnerulernissamik maanna periarfissaqalernerat qularinngilara, aammattaaq atuisutsinnut! Atuisut iluarisinnaasaannik nioqquteqarpugut suliffeqarfimmillu ingerlatsilluarsinnaalluta, Ole Bøgh Ulriksen oqarpoq.

Aningaasaqarneq amigartoorfiusoq

Piginnittut nutaat ISS Grønlandip ulloq 15. maj 2016 atuutilertumik tiguneranut aningaasartuuteqangaatsiarsimasut 2016-imut naatsorsuutit takutippaat, tassani 8.245.468 koruunit amigartoorutitut naatsorsorneqarsimallutik. Ukiup siuliani suliffeqarfik ISS Grønlandimik ateqarallarmat 4,7 million koruuninik sinneqartoorfiusimavoq.

Aamma atuaruk: GFS amigartuungaatsiarpoq, tamanna naatsorsuutit takutippaat