GEUS: Tasiilami nuna suli sisoorsinnaavoq
Inuit 13-it inigisaminnut suli uteqqissanngikkallarput, GEUS-imit nalilerneqarmat Tasiilami nuna suli sisoorsinnaasoq. Taamatut ilisimatitsipput Kalaallit Nunaanni Politiit.
Tasiilami nuna ataasinngormat unnukkut sisoormat inissiaq najugaqarfigineqartoq sisoorfigineqarpoq. Inunnik ajoqusertoqaanngilaq, oqartussallu aalajangerput najugaqartut qimagussortinneqassasut.
Kalaallit Nunaanni Politiit pingasunngornermi ullup-qeqqata siorna ilisimatitsissutigaat, politiit GEUS-imut attaveqarsimasut.
Ilisimasallit GEUS-imeersut ilaatigut satellitsikkut assilisat tunngavigalugit qanoq pisoqarsinnaaneranik naliliisimapput:
- Nalunaarutigineqartoq kingulleq tassaavoq, nunap suli sisoorsinnaaneranik GEUS naliliisimasoq. Taakku isumaqarput nunap kingullermik sisoorneratut annertutigisumik sisoortoqaqqissinnaasoq, aamma sisoorneq suli annertunerusinnaasoq.
- Taamaammat sisoorfiusimasoq suli asseqqatinneqarpoq, Kalaallit Nunaanni Politiit pigaartuisa pisortaat Malik Sandgreen oqaluttuarpoq.
Pigaartut pisortaata ilisimatitsissutigaa, najugaqartut 13-it inissiaatileqatigiiffiup inissiaataannut inissinneqarsimasut.
GEUS-ip qanoq pisoqarsinnaanera ulluni aggersuni satellitsikkut assiliat aqqutigalugit aamma najukkami politiit upalungaarsimasullu suleqatigalugit malinnaaffiginiarpaa.
Pigaartut pisortaat naapertorlugu, GEUS-ip nalilerallarsimavaa, siallingaatsiarsimanera nunap sisoorneranut pissutaasoq, aamma sila qerinnarsippat sisoortoqaqqissinnaanera aarlerinarpallaarunnaassasoq.