nunap sajunnera
Geus: Tasiilami nunap sajunnera annertungaatsiarpoq
Richterip nunap sajunneranut uuttuutaa malillugu 3.8-tut sakkortussusilimmik nuna sajuppoq
Richterip nunap sajunneranut uuttuutaa malillugu 3.8-tut sakkortussusilimmik Tasiilami nuna sajuppoq ataasinngornerup ullaavani.
KNR.gl allappoq.
- Nalunaaqutaq 7.51 nuna sajuppoq. Nunap sajuffia Tasiilap kujataata-kangiani kilometerinik 25-nik ungasitsigisumiippoq. Richterip nunap sajunneranut uuttuutaa malillugu nunap sajunnera 3,8- tut sakkortussuseqarpoq, tamannalu annertungaatsiarpoq, Danmarkip Kalaallit Nunaatalu sananeqaataanik ilisimatusartut, Geusimi seismologi, Trine Dahl-Jensen KNR-imut oqarpoq.
Tasillami, Isortumi, aamma Kangerlussuup timaani, Summit Campimi, nuna sajuttoq nalunaarsorneqarpoq.
Aseruatitertorsimanersoq suli paasineqanngitsoq, Tasiilami politiit KNR-imut oqaatigaat.
Nunap sajoqqinnissaa Tasiilami innuttaasunit ernumagineqartariaqanngitsoq Trine Dahl-Jensenip oqaatigaa.