GEUS: Sermersuup naqqa sukkasuumik aakkiartorpoq
GEUS-ip ilisimatusarsimanerata nutaap takutippaa, Sermersuup naqqa sukkasuumik aakkiartortoq, tamanna sermip aakkiartornerata qanoq annertuginera eqqarsaatigalugu naatsorsorneqartariaqarpoq.
Nunap iluata kissarnera, sukkasuumik erngup kuunnera takussutissaapput Sermersuup naqqata sukkasuumik aakkiartorneranut.
GEUS-ip siullermeersumik missiliorlugu naatsorsorsimavaa, Sermersuaq naqqamigut qanoq aakkiartortiginersoq, misissuisimanermilu inernerit Nature Communicationsikkut saqqummiunneqarsimallutik.
Tamanna pingaaruteqarpoq, Sermersuummi naqqata qanoq aakkiartortiginera, sermip aassimaneranik nalilersuisoqaraangat ilanngunneqartuaannanngimmat:
- Paasisatta takutippaa, sermersuup naqqata aakkiartornera naatsorneqarsinnaasoq, Kalaallillu Nunaanni sermersuup annertussusaanut tamanna pingaaruteqartuuvoq. Sermersuaq ukiumut 254 Gt-it missaannik annikillisarpoq, naqqaniillu aakkiartortoqarnera tamatuma 8 %-iisa missaanniippoq.
- Tamanna sermip aakkiartorneranik missingiinermut ilaatinneqartalertariaqarpoq, Sermseruummi qanoq aakkiartortiginera ilisimasariaqarparput, Nanna B. Karlsson ilisimatusarnermi aqutsisuusimasoq aamma GEUS-imi seniorforskeriusoq tusagassiorfinnut nalunaaruteqarnermi oqarpoq.
Kalaallit Nunaanni Sermersuup qanoq aakkiartortiginera, ilaatigut qanoq nittaatsigisimanersoq siallertigisimanersorlu tunngavigalugit ullumikkut nalilerneqartarpoq, tassunga ilanngullugu Sermersuarmit kaanngarlutik ilulissatut aniasartut qanoq annertutigineri aamma sermip qaavata aakkiartornerata qanoq annertutiginera tunngavigalugit nalilerneqartarluni.
GEUS-imit tamanna nakkaasunik aniasunillu misissuinertut taaneqartarpoq, siunissamilu allannguutaajumaartussanik siulittuinermi atorneqarsinnaallun.
- Taamatut misissuisarnermi sermersuup naqqata qanoq aakkiartortiginera ulloq manna tikillugu takunngitsoorneqartarsimavoq. Tamarmik ilanngunneqartarnissaat pingaaruteqarpoq, taamaanngippammi silap pissusaata allanngoriartorneranik aamma Sermersuup sila imminnut ataqatigiinnerannik paasisarluanngitsuussaagut, Nanna B. Karlsson oqarpoq.
Ilisimatusartut isumaqarput, sermersuup naqqata aakkiartornera 2000-ikkut allartinneranni annertusiartulersimasoq. Issittullu kissakkiartornera ilutigalugu Sermersuup naqqa sukkanerusumik aakkiartulissasoq naatsorsuutigalugu.
- Tamatuma kinguneranik sermeq suli annertunerusoq kaanngartalissaaq, kangerlunni immap sarfarnera allanngussaaq, nerisareqatigiittarnermut kiisalu sermip iigartarneranut sunniuteqassalluni, GEUS allappoq.