Greenland Express Air
Gert Brask: Pissutsit kikkunnut tamanut kipiluttunartorujussuupput
Ukioq manna timmisartuussisalernissaq ullormik ataatsimik sioqqullugu Greenland Express Air-ip pisortaanera Gert Brask, nuanniitsumik aalajangiisariaqarsimavoq pilersaarutit tamaasa sapaatit akunnerinik marlunnik kinguartinnissaannik. Kinguartitsinermut Angallannermut Aqutsisoqarfik pisuutippaa
– Aallarnissaq siulleq taama qanitsigilereersoq timmisartuussinissamik pilersaarutitta taamaatiinnarnissaanik aalajangerneq artornartorujussuuvoq.
Taamatut oqarpoq Air Express Greenlandip pisortaanera Gert Brask.
Soorlu Sermitsiaq.AG-p allaaaserinnissimasoq Greenland Express Airip, pingasunngormat piffissaq kingullerpaaq atorlugu Danmarkip Nunattalu akornanni selskabip ukioq manna timmisartuussisalernissaminut pilersaarunni suli ulluni 13-ini kinguartittariaqarsimagaa.
Tamanna pissutigalugu timmisartuussinissaq siulleq pissaaq juulip 15-ianni - pilersaarutaasimagaluarpoq timmisartuussinissaq siulleq pissasoq sisamanngornermi juulip 2-aanni.
– Uanga nammineq inuttut attortittorujussuuvunga angalasut taama amerlatigisut, taama sivikitsigisumik nalunaarfigalugit pakatsisikkatsigit. Pissutsit kikkunnut tamanut kipiluttunartorujussuupput, Gert Brask tusagassiorfinnut nalunaarutikkut allappoq.
Angallannermut Aqutsisoqarfik pisuutippaa
Braskip oqaatigaa akuersissutit kingulliit pisariaqartut Greenland Express Air-ip aatsaat ataasinngormat tigusimagai, taamaasillunilu aqutsisoqarfiup suliassat tamarmiusut suliarinissaannut imminut qaammatit tallimat sinnerlugit piffissalersimasoq:
– Tamaviaaraluaqaluta aningaassaliissutit, iliuuseqarnissamut isumaqatigiissutit, attartornermut isumaqatigiissutit il.il., akuersissutiviup tiguneqarneraniit pilersaarutigineqartutut juulip 2-aanni timmisartuussinissap tungaanut ulluinnaat atugassaritinneqartut pingasut iluanni ajoraluartumik iluarsineqarsinnaasimanngillat.
– Imatut inissinneqaratta, nalunartoqartinneqarluni sapaatit akunnerini siullerni pilersaarutivut malillugit timmisartuussisinnaanersugut, aalajangerpugut pilersaarutit ulluni amerlasuuni taamaatiinnarniarlugit, atuisartuvut pakatsiseqqikkumanagit, Greenland Express Airip pisortaanera nassuiaavoq.
Gert Brask sivisuumik Sermitsiaq.AG-mit apersorneqarusuttarsimanngilaq, aviisillu pisimasoq misissorpaa.