Skip to main content

Gert Brask: Neriorsuivunga marsimi timmisartuussisalissasugut

Upernaaru kalaallit jyllandillu avannaamiut Greenland Express-imik toqqaannartumik attaveqalissapput, aallartitsisoq siusinnerusukkut taamatut neriorsuutiminik arlaleriarluni maangaannartitsisarsimasoq, neriorsuivoq

Aallarnisaasup Gert Braskip, arlaleriarluni iluatsinngitsumik misiliisarsimagaluaruni, Kalaallit Nunaannut timmisartuussivinnik nutaanik aallartitsinissani suli taamaatiinnanngilaa.
Ilami suliniut iluatsinnissaminut aatsaat taama qanitsigaaq, Brask oqarpoq, taassumalu aasap naalernerani aningaasaliisussani pisortarlu annaasimavai, taamaattumillu aallaqqaataanit aallartilluni.
Maannali nutaanik aningaasassaqalerpugut, taanna qularnaarivoq, neriorsuillunilu Greenland Express ilisaritillugu tusagassiortunik katersortitsiumaarluni, eqqartuussissuserisuata isumaqatigiissutit inissereerpagit.
– Eqqartuussissuserisut kingulliit inissititerpaat, taamaasillunilu aappaagu kingusinnerpaamik marsip 3-anni timmisartuussisalissaagut, Gert Brask oqarpoq.
Taassuma oqaatigiumanngilaa aningaasaliisut kikkorpiaanersut, oqarlunili tassaasut nunat allamiut aningaaserivii ingerlatgsiviilu, timmisartuussinermik immikkut ilisimasallit.
– 10 millioner euro-t (75 millioner koruunit missarpiaat, aaqqiss.) atussavagut. Eqqartuussissuserisut apeqqutaalerput, pingaarnerusumilli ingerlatseriaasissat isumaqatigiissutigisimavagut, Gert Brask oqarpoq.
Atuaruk: "Greenland Express misileeqqippoq"
Atuaruk: "Greenland Express takorluugaannaasimavoq"
Aallartitsisoq malillugu suli isumaliutaavoq timmisartoq inuttaalu Hollandimi Denim Air-imit attartorneqassapput, taannalu timmisartunik Air Bus 320-nik peqanngilaq - imaluunniit tamakkua atornissaannut akuersissuteqarani - Gert Brask siusinnerusukkut oqarsimagaluartoq timmisartoq taamaattoq atorneqassasoq.
Taarsiullugu selskabip timmisartuutaasa annersaat tassaavoq brasiliamiut sanaavat Embraer ERJ-190, taannalu ulikkaarluni ilaasoqarluni - ilaasut 100-t - 3.500 kiilometerinik isorartussusilimmut timmisinnaavoq.
Tassa Københavnimit Kangerlussuarmut isorartussusilimmut, taavali naammattumik orsussaqanngilaq uiarterisariaqassaguni imaluunniit mittarfimmut allamukassaguni, mittarfik ornitaq matusimappat.
Aqqutaani mittarluni ingerlaannarlunilu
– Embraer atussagutsigu Kalaallit Nunaannukarnitsinni aqqutaani mittassaagut. Danmarkiliarnitsinni ingerlaannartarsinnaavugut. Siunertaraarpulli Airbus-imik atuinissarput. Denim Air tamakkuninnga atuinissaminut maannakkorpiaq akuersissuteqanngilaq, piffissarli sivikitsoq atorlugu akuersissut pisinnaavaa. Taamaanngippat timmisartortitseqatigiiffiup allap atornissaa isumaliutigaarput, aallartitsisoq oqarpoq.
Taanna aallaqqaammut Denim Air-imit timmisartumik ataatsimik attartorniarput, piffissap ingerlanerani marlunngortinniarlugit.
– Pilersaarutaavoq piffissap ingerlanerani timmisartumik ingerlatsinissamut nammineq akuersissuteqalissasugut, ukiualuilli ingerlareerpata. Maanna aallarteqqaalaassaagut, Gert Brask oqarpoq.
Timmisartorsuarnik Airbus 320-nik peqannginnermi saniatigut Denim Airip aamma amigaatigaa Gert Braskip siusinnerusukkut oqaatigisarsimasaa issittumi ingerlatsinissamut akuersissut. Taamaattumilli peqanngilluinnarpoq, Angallannermut Aqutsisoqarfik Sersmitsiaq.AG-mut paasissutissiivoq, taarsiullugulu siunnersuutigalugu pineqarsimassasoq MNPS, Atlantikullu avannaani timmisartuussisarnissamut akuersissummik taamaattumik peqartariaqarpoq.
– Tamanna naluara. Angallannermut Aqutsisoqarfik Denim Air-imit piumasaqarsimavoq. Uanga tamanna ilisimasaqarfiginngilara, taassumali pissarsiarinissaa sivisunnginnerarpaat, Gert Brask oqarpoq.
Gert Brask: 100 procentimik qularnanngilaq
Upperineqarsinnaava kinguartitseqattaarnerit kingorna marsimi timmisartuussisalissasusi?
– !00 procentimik qularnanngilaq, aallartitsisoq oqarpoq.
Maanna pilersaarutit malillugit Greenland Express timmisartuussisassaaq Aalborgimit Narsarsuarmut, Kangerlussuarmit Keflavikimut, taamatuttaaq Københavnimit.
Greenland Express tusarfigeqqaarparput siorna oktobarimi, qinersisoqarnerali ingerlatsiviullu iluani ajornartorsiutit pissutigalugit 2013-imi aasakkut timmisartuussisalernissamik sinnattu maangaannarpoq, tamatumalu kingorna aallartinnissaa arlaleriarluni kinguartinneqartarluni.
Greenland Express pillugu Sermitsiaq.AG-p allaaserisai tamaasa atuakkit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER