Greenland Express Air

Gert Brask: Ikiorneqarnissatsinnut pisariaqartitsivugut

Greenland Express Airip suleqataata amigartumik sulinera timmisartuutileqatigiiffimmut eqquivoq

Greenland Express Airip pisortaanera Gert Brask

Greenland Express Airip timmisartuutileqatigiiffik suleqatigisaa Hollandimeersoq Denim Air ACMI timmisartumi sulisunik amigaateqarnera pissutaalluni nutaamik aningaasaliisussamik ujarlernissaq pisariaqassasoq Gert Brask oqarpoq.

KNR nutaarsiassiivoq.

- Maannakkut assut artornarsivoq. Timmisartumik attartortitsinitsinnit nunatta kujataaniillu timmisartoq ulikkaartarlugu angallassinitsinnit isertitagut ingerlaannartumik - ilaatigullu suli isertinneqanngitsut – atortariaqarsimavagut, ingerlatitsisutta Denimip suliassat angumerisinnaanngimmagit, KNR-imit aperineqaramik timmisartuutileqatigiiffik matunngujoornersoq Gert Brask oqarpoq.

Ikiortissarsiortut
- Tamanna eqqoriarsinnaanngilara. Maannarkut tamaviaaqaagut. Ikiornissaqarnissarput pisariaqartipparput. Angalanissanik allanngortitsinernut 2,8 millioni koruunit, akiliutigisanillu utertitsinitsinnut 1,9 millioni koruunit akiliutigereerpagut, pisortaq neriuutaarussimarpaluttoq oqarpoq.

- Ingerlanerput maannakkut equngavoq, timmisartumili pingasunik sulisoqarsimasuugutta ingerlalluarsimassagaluaqaagut. Novembarip tungaanut suliassarpassuaqarpugut, Gert Brask KNR-imut oqarpoq.

Greenland Express Airip timmisartua Fokker-100 juunip 17-ani angallasserngaarpoq.

Timmisartuutileqatigiiffiup Aalborg, København, Keflavik, Kangerlussuaq aamma Narsarsuaq aqqusaartarpai.

Sermitsiaq.AG-ip Denim Air ACMI-p pisortaanera Ronald Janssen pissarsiariniarsaraa, tassani suut ajornartorsiutigineqarnersut paasiniarneqassalluni

Powered by Labrador CMS