GE: Malittarisassat nutaat suliffeqarfinnut allaffissornikkut annertuallaamik suliassaqartitsilissapput

Tamakkiisumik ilaannakuusumilluunniit akiliunneqarluni ineqartitaanerup akileraarusersorneqarneranut malittarisassat nutaat suliffeqarfinnut allaffissornikkut unammilligassanik pilersitsipput, Sulisitsisunit oqaatigineqarpoq.

Inatsimmik allannguisoqarneratigut pingaartumik Nuummi inissiat nutaajunerusut, suliffeqarfinnit sulisut atugassiissutigineqartut, akileraarusersorneqarnerat annertunerulersinneqassaaq.

Ajunngitsorsianik tunniunneqartartunik – tassunga ilanngullugu tamakkiisumik ilaannakuusumilluunniit akiliunneqarluni ineqartitaanermut – akileraarusersuinermut inatsit nutaat - atuutilersinniarneqalerpoq.

Pingaartumik akiliunneqarluni ineqartitaanermut akileraarutinik akiliuteqarnissamut malittarisassat nutaat suliffeqarfinnut ajornartorsiortitsipput, sulisitsisut peqatigiiffiannit Sulisitsisunit (GE) oqaatigineqarpoq.

- Suliffeqarfinnit arlalinnit nalunaarfigineqarpugut, tamanna allaffissornikkut suliassarujussuusoq, GE-mi allattoqarfiup pisortaa, Karsten Lyberth Klausen, Sermitsiaq.AG-mut oqarpoq.

Malittarisassat nutaat kingunerisaannik akiliunneqarluni ineqartitaanermut pingaartumik Nuummi inissiani nutaajunerusuni akileraarusersuineq qaffaavigineqangaatsiassaaq.

Naliliisarneq qaffariaateqassasoq

Sermitsiaq.AG-p paasissutissaatai naapertorlugit, malittarisassat januaarip 1-ani 2022-mili allanngortinneqarsimanerat suliffeqarfiit ilaannit paasineqanngitsoorsimavoq, tamatumanilu inissiamik illumilluunniit pisinerup akia tunngavigalugu akileraarusiinissamut tunngavissaq kvadratmeterimut ataatsimut 6.000 koruuninik qaffanneqarsimalluni. Tamatuma kinguneranik, sulisut ilaasa akileraarujussuartussaanertik ilimagisinnaavaat.

Maannamummi tamakkiisumik ilaannakuusumilluunniit akiliunneqarluni ineqartitaanerup akileraarusersorneqarnerani pingaaruteqarluinnartoq tassaasimavoq inissiamik naliliineq kvadratmeterimut ataatsimut annerpaamik 15.000 koruuniusussaq.

Aningaasat taakkua ukiut arlallit ingerlaneranni qaffakkiartuaarneqassapput, inissiat kvadratmeterimut ataatsimut 35.000 koruuninik nalilerneqarsinnaasunngorlugit, malittarisassallu nutaat kingunerisaannik, suliffeqarfiit sulisuminnut inissaqartitsisut inissiat nalinginik naatsorsueqqittariaqassallutik. Tamannalu Sulisitsisut naapertorlugu allaffissornikkut unammilligassarujussuuvoq.

Akissarsiat tatineqalernissaat ernummatigigaat

Karsten Lyberth Klausen erseqqissaalluni oqarpoq, nalilersuinerup annerpaaffissaata qaffanneqarnerata taamaaliornikkullu ullutsinnut naleqqunnerulersinneqarnerata pissusissamisoorsinnaanera Sulisitsisunit pingaarnertut takuneqarsinnaasoq. Naalakkersuisut kissaatigeqqaarsimagaluarpaat nalilersuinerup annerpaaffissaa 15.000-init 35.000-inut iliuuseqarnermi ataatsimi qaffanneqassasoq, kisianni Sulisitsisunit annertusiartuaartitsinissaq siunnersuutigineqarsimasoq, tamannalu aaqqiissutigineqartussamut assingusoq. Aningaasat ukioq manna kvadratmeterimut ataatsimut 21.000 koruuninut qaffanneqarput kvadratmeterimullu ataatsimut 35.000 koruunit 2024-mi anguneqassallutik.

Naatsorsueriaatsip ullutsinnut naleqqunnerusup pissusissamisoorsinnaanera Sulisitsisunit takuneqarsinnaagaluartoq, tamatuma naggaterpiaatigut akissarsiat tatineqalernerannik kinguneqassasoq Sulisitsisunit ernummatigineqarpoq, sulisut tamakkiisumik ilaannakuusumilluunniit akiliunneqarluni ineqartitaanerup qaffasinnerusumik akileraaruserneqartaleranut taarsiivigineqarnissamik piumasaqassammata.

Januaarip 1-ani malittarisassat allat arlalissuit atuutilissapput, taamaalilluni ajunngitsorsiat tunniunneqartut aningaasarsiatut B-tut naatsorsorneqartarunnaarlutik aningaasarsiatut A-tut naatsorsorneqartalissallutik. Taamaalilluni ajunngitsorsiat akileraarusersorneqarnerat qaffariaateqassaaq, aningaasarsianut B-nut ilanngaat 5.000 koruuniusoq atorneqarsinnaajunnaassammat.

Inatsimmik allanngortitsinermi tunngavilersuutigineqartoq tassaavoq, pingaartumik akissarsiakkaat ajunngitsorsiaqartitaasarnerat, ajunngitsorsiallu akissarsiat assigalugit akileraarusersorneqartariaqarnerat.

Powered by Labrador CMS