GE aamma SIK: Inissaqarniarnermut suliami aaqqiisoqarli
Namminersorlutik Oqartussat aamma Kommuneqarfik Sermersooq inissaqarniarneq pillugu sivitsortumik aaqqiagiinngittoqarnerani suliaq atasinnaanngilaq, inissarsiortunullu annertuumik kingunerluuteqassalluni. Aaqqiagiinngissut aaqqissiuk, GE-p Nuummi immikkoortortaqarfia aamma NSIP taama oqarput.
SIK-p Nuummi immikkoortortaqarfia, NSIP aamma Sulisitsisut Nuummi immikkoortortaqarfiat Namminersorlutik Oqartussanut aamma Kommuneqarfik Sermersuumut sakkortuumik kaammattuuteqarput inissaqartitsineq pillugu aaqqiagiinngissut pillugu aaqqiinissaannut.
Suliami Kommuneqarfik Sermersooq Nuummi namminersorlutik attartortitsisartunit inissianik 300-t missaannik attartorsimavoq, taakkulu inissiaatileqatigiiffiup ataani Iserimmi attartungassanngortillugit. Taama isiorneq Namminersorlutik Oqartussanit apeqquserneqarpoq ilumut kommuni inatsimmik malinninnersoq taamatullu Kommunit Nakkutilliisoqarfiannut suliaq ingerlateqqissimallugu.
Assiliaq tamaat isigisiuk
Nuummi SIK-p aamma Sulisitsisut immikkoortortaqarfiisa suliaq ataatsimut qanoq kinguneqarnersoq takuneqarnissaa kissaatigineruaat. Sulisitsisut aamma SIK tusagassiorfinnut nalunaaruteqarlutik nassuiaapput Kommuneqarfik Sermersooq inissianik attartortitseqqiinermigut inissianik 500-nik ikinnerunngitsunik "sananeqartussaasimanngikkaluartunik ullumikkut sanaartortoqarsimasneranut" sunneeqataavoq. Ineriartornerlu tamanna suliassaqartitsillunilu inissaqartitsivoq.
- NSIP-imut pingaaruteqarpoq, ilaasortatsinnut sulifissaqarneq suli qaffasimmat, aamma inissiat akiisa ilaasortatsinnut naleqquttuunissaat, Josef Therkildsen allappoq.
Aningaasaleerusunneq annikillivoq
Sulisitsisut isumaqarput sanaartorneq patajaattumik ingerlanneqartariaqartoq, inissiaateqarnermullu tunngatillugu politikki allanngorarpat sanaartornermut sunniuteqarnerlussinnaasoq.
Namminersorlutik Oqartussat aamma Kommuneqarfik Sermersooq inissiaateqarnermut tunngatillugu assortuunnamata, sanaartornerup iluani ineriartortoqarnissanik kingaallassaaratarsinnaavoq:
- Piffissaq ungasinnerusoq isigalugu sanaartornermut tunngasut Sulisitsisut ilaasortaannut
patajaatsuusariaqarput suli inissianut aningaasaliissuteqarniarunik. Sinaakkutissat aalajaatsuussapput aamma nikerartumik suliassaqarneq pinnagu. Taamaasilluni inuussutissarsiornermik ingerlataqartut sulisut ajunngitsut aalajaatsullu sulisoriinnarsinnaavaat peqatigitillugulu ilinniartut ilinniagaqalersinnaapput, Nungo Pedersen, Sulisitsisut Nuummi immikkoortortaqarfianit taama oqarpoq.
Namminersorlutik Oqartussat suliamik kommuninut nakkutilliisoqarfimmut tunniussereernerata kingorna Nuummi sanaartornissamut danskit soraarnerussutisiaqartunut aningaasaateqarfiisa ilaat aningaasaliinissamut utaqqimaassalluni aalajangersimavoq.
- Tamanna aningaasaliiniartunut ajoqutaalluinnarpoq, Nuummiinnaanngitsoq kisianni aamma Kalaallit Nunaat tamakkerlugu. Politikkikkut patajaassuseq tamatta pisariaqartipparput. Taamaattumik inussiarnersumik qinnuigissavassi isumaqatigiinniaqqullusi eqqissisaataasumik nuannaarutaasumillu aamma NSIP-p aamma Nuummi Sulisisitsisut ilaasortaanut iluaqutaasumik – aap, inuiaqatigiinnut tamanut, Sulisitsisut aamma SIK nalunaaruteqarput.