sanaartorneq

GA: Sanaattornermi pilersaarusiornerlunneq suliffissaqartitsinermut eqquivoq

Namminersorlutik oqartussani pilersaarusiornerup pitsaannginnera sanaartornermut eqquinerluttoq Sulisitsisut Peqatigiiffiat GA naliliivoq

Sanaartugassat pillugit pilersaarusiornerlunneq suliffissanik annaasaqaataasoq, GA isumaqarpoq

Sulisitsisut Peqatigiiffiata GAp 2014-mi sanaartugassat ernumaammersumaarutigai. Assartukkat ikilinerat sanaartornerup unikaallassimaarneranut takussutissaasoq peqatigiiffik isumaqarpoq, aammalu sanaartortut suliffissaaleqisut amerliartornerat takusinnaalereernerarlugu.

Nunatsinni naatsorsueqqissaartarfiup ilisimatitsissutigaa nunatsinni inuussutissarsiutit nalilittut pilersitaat 2012-mi 13 procentimik appairasimasut. Tamanna sanaartortut akornanni suliffissaaleqinerup annertusineranik kinguneqartoq GA nalunaarpoq.

- Tamatuma kingorna imaani inittunertut siaruaattarput isumaginninnermi aningaasartuutit akileraarutinillu akiliutit ikilinerannik kinguneqartumik, GAp pisortaa Brian Buus Pedersen nalunaarpoq.

Sanaartornermut iluarsaassinermullu aningaasaateqarfik aqqutigalugu sanaartugassat ilarpassui aningaasaliiffigineqartarput. Pilersaarutilli ilarpassuit piviusunngorneq ajorput.

Soraarsitsinerit
- Sanaartornermut iluarsartuussinermullu aningasaateqarfiup erseqqilluinnartumik nalunaarutigereerpaa. Suliassat ilarpassui allaffiup qaavaniit ingerlaqqinngitsoortarput, Brian Buus Pedersen oqarpoq.

Maanna GA aamma ineqarnermut naalakkersuisoq Siverth K. Heilmann sapaatip akunnera tulleq ataatsimeeqatigittussanngorput. Tassani illuatungeriit eqqartussavaat sanaartugassat pillugit pilersaarusiorneq qanoq pitsanngorsarneqarsinnaanersoq.

- Politikkikkut akisussaassusermik takutitserusulerneq isumalluarfigalugu iliuuseqartoqarnissaa GAp piumasaraa. Sanaartornermi suliffeqarfiit utaqqeqqissinnaajunnaarput. Suliassaqannginneq sulisunillu pikkorissunik soraarsitsisariaqarnerit amerlavallaanut ulluinnarsiutaalerput. Suliffissanik sungiusaammillu suliffissanik amerlanerusunik Naalakkersuisut isaassiffineqarnissamik pisariaqartitsissappata GAp ilaasortai piareersimapput, tamannali pissappat aningaasat millionilikkaat Inatsisartut aningaasaliissutigeriigaat atorlugit sanaartugassanik aallartitsisoqarnissaa pisariaqarpoq, Brian Buus Pedersen oqarpoq.

Powered by Labrador CMS