Skip to main content

GA: Avaleraasartuulerngusaannermi Kalaallit Nunaata ajorsarnini akuersaaginnassavaa?

Avaleraasartoorniarneq pillugu EU-mik isumaqatigiissuteqarnermi Island Kalaallillu Nunaat puigorneqarput

Atlantikup avannaani avaleraasartoorniarneq pillugu ukiuni arlalinni isumaqatigiinngittoqareersorlu aalajangiigallartoqarpoq, tassami EU, Norge Savalimmiullu ukiuni tallimani atuuttussamik isumaqatigiissuteqarmata. Savalimmiut piumasaqaataat amerlasuutigut akuersaarneqartut, Island aamma Kalaallit Nunaat puigorneqarput.
– Altantikup avannaani avaleraasartuulernusaanneq imartamut Kalaallit Nunaata aalisarnikkut oqartussaaffigisaanut pulasimavoq, Henrik Leth oqarpoq, taannalu aalisarneq avammullu tunisassiorneq pillugit Sulisitsisut ataatsimiititaliaanni siulittaasuuvoq.
–  Nalunanngilaq Savalimmiut, Norgep EU-llu isumaqatigiissutaat kalaallit aalisarnerannut toqqaannertumik ajoqusiimmat. Isumaqatigiissut taanna – isumaqatigiissuteqartut akunnerminnik pisassiissutinik agguaassinerisa saniatigut - allatut paasineqarsinnaanngilaq, tassami nunat allat assigalugit kalaallit aalisarsinnaanerannik akornusiinissaq siunertarineqarpoq. Nunat tamalaat aalisarnikkut anguniagaat taamatuttaaq ileqqorissaarnissaq eqqarsaatigalugit, taamaaliorneq akuersaarneqarsinnaanngilaq, Henrik Leth oqarpoq, isumaqarporlu isumaqatigiissummi kalaallit soqutigisaat isumaginiarneqarsimanngitsut.
– Akerlianik isumaqatigiissummi allassimavoq, isumaqatigiissuteqartut Kalaallit Nunaata imartaani aalisarnissamut aalisariutinik atortuliisoqarsinnaanngitsoq, atortuliisoqaraluarpammi aalisariutinik uagut nammineq piginngisatsinnik atortuliinikkut iluaqusiisoqarsinnaagaluarmat. Tamanna allatut paasisassaanngilaq, tassalu aalisarnikkut Kalaallit Nunaata nammineq siuarsaanissaa pinngitsoortinniarneqartoq. Taamatut iliuuseqarneq naalagaaffeqartigiit siuttuisa ataatsimiittarnerini aammalu suleqatigiinnissamik EU’p isumaqatigiissutaanik taaneqartartumi oqaaserisartakkanut kusanartunut naleqqutinngilaq.
– Tupigusuutiginngitsuugassaanngilluinnarpoq, erseqqilluinnartumik nuna nammineq isumalluutini atorlugit tamakkiisumik piujuartitsinermik tunngaveqartumik aningaasatigut imminut napatissinnaalerniarsarisoq sanngiillisarniarlugulusooq suleqatigiit isumaqatigiissusiorsimanerat. Isumaqatigiissummi kalaallit aalisarsinnaanerinik akornusiiniartoqarnera Islandip aalisarnermut naalakkersuisuata oqaasiinit uppernarsarneqarpoq:
”Kalaallit Nunaata imartaani avaleraasartuut amerliartornerat eqqarsaatigalugu Kalaallit Nunaanni aalisarnermik tamatumalu piorsarnissaanik akornusiiniarnissaq Norgep oqallisigaa.”
Taamaattumik Sulisitsisut inassutigissavaat isumaqatigiissummi Nunatsinnut toqqaannartumik tunngatinneqartut piaarnerpaamik peerseqqullugit Naalakkersuisut EU-mut taamatuttaaq danskit naalakkersuisuinut naammagittaallioqqullugit, aalisarneq avammullu tunisassiorneq pillugit Sulisitsisut ataatsimiititaliaanni siulittaasoq naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER