nalunaarusiaq
GA: Aaqqissuusseqqittoqartariaqarpoq taamaanngippat aningaasaqarneq ajornerulissaaq
Aningaasaqarnermut Siunnersuisooqatigiit ukiumoortumik nalunaarusiaat Kalaallit Nunaanni Sulititsisut Peqatigiiffiannit nalilersuutaasut isumaqatigaat
Kalaallit Nunaata aningaasaqarnera ilorraap tungaanut saatinneqassappat aningaasaqarnikkut aqutsinermi aaqqissuusseqqittoqartariaqartoq Aningaasaqarnermut Siunnersuisooqatigiit ukiumoortumik nalunaarusiaminni ilaatigut nalilersuipput.
- Ineriartorneq taamaattoq iluatsissappat aaqqissuusseqqinnissat arlallit pisariaqartinneqarput, Aningaasaqarnermut Siunnersuisooqatigiit tikkuaapput.
- Qanoq ajortumik sunnerneqariaannaatiginerput ukiuni kingullerni ineriartornerup aamma takutippaa. Aningaasaqarnermi aalisarnerup iluani periarfissat akillu ineriartornerat apeqqutaasorujussuupput, Aningaasanut Siunnersuisooqatigiit ilaatigut allapput.
Iliuuseqartoqartariaqartoq
- Periuseq suli ilisimaneqanngitsoq TAC raajanut atorneqalerpat, siunissami aningaasaqarneq Aningaasanut Siunnersuisooqatigiit naatsorsuutaannit ajornerusinnaavoq, Sulisitsisut Peqatigiiffianni pisortaq Brian Buus Pedersen oqarpoq.
- Ukiuni sisamani namminersornitta nalaani suli politikkikkut aaqqissuusseqqittoqaqqissimannginnera ajornartorsiutaavoq annertooq, soorlu aamma tamanna Siunnersuisooqatigiinnit oqaatigineqartoq. Aningaasaqarnikkut imminut napatittumik sulisoqassappat aaqqissuusseqqittoqartariaqarpoq, Brian Buus Pedersen Aningaasaqarnermut Siunnersuisooqatigiit ukiumoortumik nalunaarutaat oqaaseqarfigaa.
Sulisitsisut Peqatigiiffiata Siunnersuisooqatigiit isumaqatigilluinnarpaat:
- Suli aaqqissuusseqqittoqanngilaq, tamanna ilutigalugu atorfissaqartinneqartut annertusiartuinnavipput, Brian Buus Pedersen oqarpoq. Aningaasaqarnermut Siunnersuisooqatigiit ineqarneq pillugu isornartorsiuinerat Brian Buus Pedersenimit isumaqatigineqarpoq, ineqarfiimmi pitsanngorsarneqartariaqartut isumaqaramik.