Future Greenlandimi tusaaniagassagut
Future Greenland Nuummi Katuami marlunngornermi pingasunngornermilu ingerlanneqarnissaanut 400-t peqataanissartik nalunaarutigaat. Amerikamiut aallartitaat Carla Sands oqalugialerpat peqataasut immikkut tusarnaarluassagatinneqarput.
Amerikami nunanut allanut ministerip Mik Pompeop sapaatip akunnerata siuliani qallunaallu kalaallillut nunanut allanut naalakkersuisuinik ataatsimeqateqarnissani taamaatippaa, tamatumalu kingunerisaanik amerikamiut Qallunaat Nunaanni aallartitaat Future Greenlandimi peqataalerpat oqalugiaateqarnissaa immikkut malinnaavigineqassaaq.
Sinniisoq
Amerikamiut Kalaallit Nunaanni sinniisoqaqqilernissaat paasissutissiarineqarpoq, tamannalu naalagaaffiup pissaanilissuup Kalaallit Nunaanni minnerunngitsumillu Issittumi sunniuteqarusussuseqarneranik takussutissaavoq.
Mike Pompeollu Ane Lone Baggerimut Anders Samuelsenimullu taamaatitsinerata kingunerisaanik taanna allanik nutaarsiassaateqarnerpa. Apeqqut tamanna pissaganarpoq.
Lidegaard taamaatitsisoq
Ataatsimeersuarneq 400-nit peqataaffigineqarluni Kalaallit Nunaannit ataatsimeersuarnerni annertunerpaavoq, pilersaarummulli atatillugu ataasiinnaq peqataanisamik taamaatitsisimavoq. Qallunaat Nunaanni folketingimut qinersinissaq pissutigalugu Martin Lidegaard peqataassanngilaq taarserneqassananilu. Taanna ‘Rigsfællesskabets betydning for Danmark’ qulequtaralugu saqqummiussisussaangaluarpoq.
Atorfilittaq alla qinersisoqarnissaat pissutigalugu aamma oqalugiaateqassanngilaq, ataatsimeersuarnermilu peqataassaaq. Thomas Vinkler qallunaat Canadami aallartitaat Canadap Kalaallit Nunaata suleqatigiinnerat pillugu oqalugiaateqartussaangaluarpoq. Taarsiullugu Canadamiut Qallunaat Nunaanni aallartitaat Emi Furuya oqalugiaateqassaaq.
Nammineerneq namminiilivinnissamullu aqqut
Ataatsimeersuarnermi qulequtat ilaatigut ilagaat Kalaallit Nunaata namminiilivinnissaanut suut piumasaqaataanersut. Tassunga atatillugu Aningaasaqarnermut Naalakkersuisoq Vittus Qujaukitsoq Kalaallit Nunaat namminersortoq – takorluukkat tunngaviusumillu inatsisissaq pillugu isumalioqatigiissitap suliai qulequtaralugu oqalugiaateqaqqaassaaq.
Ataatsimeersuarneq Suleqatigiissitsunit aaqqissuunneqartoq, arfinilissaanik ingerlanneqassaaq ukiullu marlukkaarlugit ingerlanneqartarluni.