Futsal: William Gantzhornip klubbia Champions Leaguemi ingerlaqqippoq

Danskit futsalimi timersoqatigiiffiat, JB Futsal Gentofte, Kalaallit Nunaat sinnerlugu unammisartumik unammisartoqarpoq, tassa William Gantzhorn. Timersoqatigiiffik futsalimi Champions League-mi ingerlaqqippoq akunnerup naanerani.

Ingerlaqqissagunillu timersoqatigiiffik Østrigimeersoq Wr. Neustadt ajugaaffigisussaavaat.

Ajorsaleraluarnermit ajugaasut

- Unamminermi 3-1-mik kinguaraluarpugut, ingerlaqqissaguttalu ajugaasariaqarluta. Unamminermi minutsit tallimat kingulliit aatsaat taama pissangatigaanga, William Gantzhorn Sermitsiaq.AG-mut oqarpoq.

Unamminermi minutsit arfinillit amigaataasut JB Futsal Gentofte 3-1-mik kinguaqqavoq, minutsinili kingullerni pingasoriarlutik isertitsigamik 4-3-mik ajugaallutik.

- Ajorsaleraluarnermit unammineq mumipparput, unamminerup naammassinissaanut minutsi ataaseq sekundillu 38-it amigaataasut 4-3-mik siuarluta. Aatsaat taama pikkunartigisumik unammeqataavunga. Danmarkiliajaannginnerali pissutaalluni unammeqataavallaanngilanga, unammisaqattaarnerit sioqqullugit sungiusaqataavallaarnikuunnginnama, oqarpoq, nangillunilu:

- Champions Leaguemili unammeqataarngaarpunga, tamannalu nuannaarutigisorujussuuara.

Oktobarimi unammeqqissapput

Ukiut marluk matuma siorna Champions Leaguemi timersoqatigiiffik ingerlaqqippoq, tassanili corona pissutaalluni Europami timersoqatigiiffiit peqataasut arlaqanngillat, taannali eqqaassanngikkaanni timersoqatigiiffik aatsaat Champions Leaguemi ingerlaqqippoq.

Ukiut marluk matuma siorna Portugalimiunut Sportingimut ajorsaramik ingerlaqqinngitsoorput. Maannali Europami futsalimi qaffasissumik unammisartunut unammisussanngorput.

- Champions Leaguemi 'main round'-imik taasagaannik unammeqataassaagut, taamaammat Kosovomut unammiartussaagut. Unammeqattaarnissani peqataajumallunga sungiusarluarniarpunga, William Gantzhorn oqarpoq.

Champions Leaguemi 'main round' oktobarip 25-anit ingerlanneqassaaq.