Futsal: Uku GM-imut anngupput

Illup iluani isikkamik arsaalluni pissartanngorniunnermut annguttut siulliit pingasut nassaarineqareerput.

Angutini illup iluani isikkamik arsaalluni pissartanngorniunnernut anngunniunnerit siulliit sapaatip akunnerata naanerani ingerlanneqaqqammerput.

GM angutinut Narsami ingerlanneqassaaq uge 17-imi.

Holdit pingasut uku anngupput:

Nagdlunguak-48 Ilulissaniit

I-69 Ilulissaniit

Kugsak-45 Qasigiannguaniit

Anngunniuttut qulingiluat

Kalaallit Arsaattartut Kattuffiata ilisimatitsissutigaa Qeqertalimmi anngunniunnermi finali ingerlanneqartoq pissanganarluinnarsimasoq. Kugsak-45 Qasigiannguaneersoq aamma G-44 Qeqertarsuarmeersut unammigamik tamarmik pingasoraartut unammineq naammassivoq. Naligiimmata unammineq sivitsorneqarpoq, tassanilu Kugsak-45 marloraarluni 5-3-mik ajugaalluni.

Avannaani Qeqertalimmilu anngunniunnermi holdit qulingiluat peqataasimasut KAK-p ilisimatitsissutigaa.

Avannaani inernerit:

  1. Nagdlunguak-48
  2. I-69
  3. UB-83
  4. Qaanaaq Sport Club

Qeqertalimmi inernerit:

  1. Kugsak-45
  2. G-44
  3. T-41
  4. KB-84
  5. Disko-76

Anngunniunnerit tullii Sermersuumi ullumi ingerlanneqassapput, Kujataanilu anngunniunnerit sapaatip akunnerata naanerani ingerlanneqassallutik.

KAK ilisimatitsivoq Sermersuumiit holdit pingasut aamma Kujataaniit holdi ataaseq futsalimi GM-imut aamma anngutissasut.

Angutinut illup iluani isikkamik arsaalluni pissartanngorniunnerit GrønlandsBankenimit aningaasaliiffigineqarput.

Powered by Labrador CMS