Futsalimi unammisartut: Nordic Cupimut unammiartussat aajuku
Nunarput ukiut pingasut tulleriitiinnarlugit pissartanngorniunnermut Nordic Cupimut peqataassaaq. Nunanut allanut unammisartut ukioq manna piareersarluarsimasut, Kalaallit Arsartartut Kattuffiat ilisimatitsivoq.
Futsalimi pissartanngorniunneq Nordic Cup, Danmarkimit, Finlandimit, Norgemit, Sverigemit kiisalu Nunatsinnit peqataaffigineqartoq, Skjern Bank Arenami decembarip sisamaannit arfineq-pingajuannut ingerlanneqassaaq. Kalaallit Arsaattartut Kattuffiat tusagassiuutinut nalunaarummi taama ilisimatitsivoq.
- Matumani futsalimi nunanut allanut unammisartut angutit piareersarluarsimanerat ukioq manna maluginiagassaavoq, arsaattartut kattuffiat nalunaaruteqarpoq.
Nunanut allanut unammisartut oktobarip aallartinnerani sungiusaqatigiissimasut aamma Nordic Cupimut piareersarlutik Killiliisa Cupimut atatillugu sungiusaqatigiissimasut, KAK ilisimatitsivoq. Unammiuaarnissaq sioqqullugu Danmarkimi sungiusaqatigiittoqassaaq.
Neriulluartoqartoq
Unammiuaarnissaq sioqqullugu neriulluartoqartoq erseqqissaatigineqarpoq. Tassani nunanut allanut unammisartut sungiusaasuata René Olsenip unammiuaarnermi pitsaanerit pingasut akornanni inissinnissaq anguniarpaa.
- Tamanna unammisartunut pisussaaffiliivoq, KAK taama oqariartuuteqarpoq.
Skjern Bank Arenamut isiginnaarianut iserneq akeqassanngilaq aamma Kalaallit Nunaata unammineri tamaasa KNR-ip tv-ikkut aallakaatissavai. KAK-p isiginnaarianit tapersersuisoqarnissaa neriuutigaa.
Nordic Cupimi unammeqataasussat aajuku:
Måliniittut:
- Malik Hermarij
- Malik Mikaelsen
Arsartut:
- Ari Hermann
- Nick Reimer
- Rene Eriksen Petersen
- Karsten Andersen
- Nukannguaq Zeeb
- Patrick Frederiksen
- Malik Juhl
- Niklas Thorleifsen
- John Ludvig Broberg
- Markus Jensen
- Frederik Funch
- Søren Kreutzmann
- Julius Motzfeldt
- Bastian Rosing
- Amos Rosbach