Futsalimi pissartanngorniunnissat akuerineqarput
Illup iluani arsaannermi futsalimi Nunatsinni pissartanngorniuttoqarnissaa Corona pillugu Allattoqarfiup akueraa.
Futsalimi piffissami aggersumi unammisussarpassuaqalerpoq.
Tassami unammerusaartoqarsinnaanera Corona pillugu Allattoqarfiup akueraa. Taamaasilluni pissartanngorniuunnerit 18. april tikillugu unammersuaartoqarnissaa akuerineqarpoq.
Taamatut aalajangerneq arsaannermik kattuffiup nuannaarutigaa.
- Neriuppugullu inuit angalanialerunik pisortat maleruaqqusaat malissagaat. Coronartoqalissappat pilersaarusiukkat ullunik 30-nik kinguartinneqartariaqassammata imaluunniit illoqarfimmut allamut pissartanngorniuunnissat nuuttariaqassammata immaqalu pissartanngorniuuniissat ilaat unitsinneqarsinnaallutik. Taamaattumik tamatta ikioqatigiinnissarput pingaaruteqarpoq, kattuffik nalunaarpoq.
18. aprilip kingorna pisussat suli aalajangiiffigineqanngillat.
- Taamaattoq qanimut Corona pillugu allattoqarfillu attaveqaqatigiinnerput pitsaasumik ingerlavoq. Piffissarlu qalliartornerani qinnuteqaatinik 18. april-ip kingorna pisussanut nassiusseqqissaagut.