Futsalimi nunanut allanut unammisartut Polenimut ajorsarput

Kroatiami nunat assigiinngitsut peqataaffigisaannik unammisaqattaarnerni Kalaallit Nunaata futsalimi nunanut allanut unammisartui peqataapput. Polenimut ullumi marlunngornermi unammipput.

Futsalimi unammisaqattaarnerit ‘Futsal Week’ Kroatiami illoqarfimmi Porecimi ingerlanneqarput. Tassani Kalaallit nunanut allanut unammisartut angutitaat peqataapput.

Polenimut ullumi unamminermi 0-2-mik ajorsarput, Polenimiut muminnermi 0-1-mik siuaqqareersut.

Kalaallit angutitaat unamminermi takutitsilluarput, ilaatigut måliniittoq Malik Hermarij pingaarutilinnik annaaassisaqattaarluni.

Sloveniamiunut ajugaasut

Kalaallit Finlandermiunut sapaatiummat unammisaqattaarnermi unammeqqaarput. Taakku arlaleriarlugit Nordic Cup-imi siornatigut unammisareerpaat.

Unamminermi tassani Kalaallit 7-1-mik ajorsarput, kalaallini Markus Jensen isertitsisuulluni.

Oman ippassaq ataasinngornermi unammisussaagaluarpaat, Omanermiulli peqataasinnaanatik nalunaareermata sloveniamiut klubbiannut FC Bronximut unammipput. Unammineq taanna pissanganaqaaq, unamminermimi qulingiluariarluni isertitsisoqarpoq. Kalaallit Nunaat unamminermi 5-4-mik ajugaapput.

Finland aamma Polen ataasinngormat unammineranni Finland 4-0-mik ajugaavoq.

Powered by Labrador CMS