Futsalimi nunanut aallanut unammisartut misiliinermi ajugaasut

Kalaallit angutit futsalimi nunanut allanut unammisartut Nordic Cup Sverigimi pisussaq sioqqullugu misileraallutik unammipput.

Unammineq Københavnimi Valby Hallenimi pivoq, tassani Københavns futsal/DAI's futsal kredshold unammineqarput.

Unammineq sukkasuumik ingerlanneqarpoq, kalaallit unammisartuisa arsaq tigummineruaat. Unamminerup immikkoortua siulleq naammassimmat, nunanut allanut unammisartut 2-0-imik siuaqqapput.

Atuaruk: Futsalimi unammisartut nunani avannarlerni unammiuaarnermut peqataalertut

Pissanganartumik naammassisut
Unamminerup immikkoortuata aappaani Kalaallit Nunaannut arlalinnik periarfissaqarpoq, kisianni Københavns futsal/DAI's futsal kredshold 2-1-imut isertitsipput. Unamminerup naammassilernerani Kalaallit Nunaat 3-1-imut isertitseqqippoq. Unnamminerli naammassilersoq akeqqat 3-2-mut isertitsimmata unammineq pissanganarsivoq.

Nunanut allanut unammisartut unamminerup naanissaata tungaanut tamaviaartitaapput, kisianni iluatsikkamikku ajugaapput.

Unammiuaarnissamut piareertut
Nunanut allanut unammisartut sungiusaasuata Tekle Ghebrelulip unamminerup naammassinerata kingorna arsartut arsarnerat naammagisimaarpaa.

- Unammisartut piumassutsimik takutitsipput, Sverigemi unammiuaarnissamut piareersimavugut, taanna Sermitsiaq.AG-mut oqarpoq.

Futsalimi unammiuaarnissaq Nordic Cup sioqqullugu, Tekle Ghebrelul isumalluarpoq.

- Unammisartut pitsaanerpaaffimminiipput. Sungiusarluarnikuupput, aatsaallu taama pitsaatigipput.

Unammisassat nukittuut
- Unammiuaarnermi Norge aamma Danmark pointinnaffiginissaat iluatsilluarnissamut anguniagaraarput. Unammisartut Finlandimeersut Sverigemeersullu nukittoorujussuupput, kisianni naggataa tikillugu akiuutissaagut, Tekle Ghebrelul oqarpoq.

Futsalimi unammiuaarneq Nordic Cup pingajussaanik ingerlanneqalerpoq, Kalaallit Nunaallu siullermeerluni peqataassaaq. Unamminerit Sverigemi Skövdemi aamma Jönkopingimi pissapput.

Kalaallit Nunaata unamminissamut programmia (Nunatsinni nalunaaqutaq malillugu):

1. december: Finland - Kalaallit Nunaat nalunaaqutaq 13.30
2. december: Kalaallit Nunaat - Norge nalunaaqutaq 11.00
3. december: Danmark - Kalaallit Nunaat nalunaaqutaq 9.00
4. december: Sverige - Kalaallit Nunaat nalunaaqutaq 12.30

Unammisut misiliillutik unamminerat uani takuuk: